Při domjacych hrach FC Energije Choćebuz widźimy Jurja Kocha přeco w prěnich sekundach přidatneho hrajneho časa, kak swoje městno wopušći. 80lětnemu so njelubi, hdyž so přihladowarjo po hrě ze stadiona tłóča. Byrnjež sej tučasnje něhdźe 5 000 přiwisnikow domjace hry wobhladowało, Koch swojej zwučenosći dale swěrny wostawa. Swěrny je tež swojej koparskej lubosći, hačrunjež wona w štwórtej lize hraje. Z tróšku stysknosću dopomina so spisowaćel z Choćebuskeho měšćanskeho dźěla Žylow na jónkrótne koparske dny w třoch najwyšich klasach Němskeje. Tež wo tym je Žylowčan našemu reporterej Georgej Zielonkowskemu powědał.
Hladajo na Wašu zahoritosć za kopańcu dyrbju so wězo prašeć, hač sće hdy tež sam aktiwnje za bulom honił?
