Starosće łužiskich rybarjow chutnje brać
Stróža pola Rakec (SN/MiR). Jězba k łužiskim hatam bě za generalneho sekretara sakskeje FDP Torstena Herbsta zdobom dopóznaće. „Cyle jasnje trjebaja łužiscy rybarjo podpěru, zo njeby so tele powołanje zhubiło“, rjekny kandidat za wólby zwjazkoweho sejma we wólbnym wokrjesu I wčera w rybarstwje Karstena Ringpfeila w Stróži pola Rakec. Na lětnjej turje zbliža sej wón zhromadnje z čłonom wokrjesneho předsydstwa FDP Reinerom Deutschmannom starosće łužiskich předewzaćelow. Wčera zaběrachu jeju rybarjo a wuwiće jich wobłuka. „Nam je wažne, zo problematiku kormoranow chutnje bjerjemy a rozrisamy“, Karsten Ringpfeil wuzběhny, „při tym je trjeba ju w europskim konteksće widźeć, wšako njebědźa so jenož tudyši rybarjo z ptakami, kotrež wulki dźěl rybow zežeru, ale tež ći w susodnej Čěskej a Pólskej.“
Gabriel Katar wopytał
Doha (dpa/K/SN). Zwjazkowy wonkowny minister Sigmar Gabriel (SPD) je dźensa mały, ale bohaty emirat Katar wopytał. W stolicy Doha přija jeho emir šajch Al-Thani. Wčera bě Gabriel swoju třidnjowsku wizitu w kónčinje Persiskeho zaliwa z wopytom Sawdi-Arabskeje a Zjednoćenych arabskich emiratow zahajił. Wobaj krajej Katarej wumjetujetej, zo teroristow a ekstremistow podpěruje, čehoždla stej diplomatiske zwiski z nim přetorhnyłoj.
Macron připowědźa reformy
Paris (dpa/K/SN). Na wurjadnym zeńdźenju parlamenta we Versaillesu je francoski prezident Emmanuel Macron přilubił, zesylnić Francosku z přetwarom institucijow. Zdobom wón připowědźi, wuwzaćny staw w nowembu skónčić a z hišće raznišimi naprawami nowym terorowym nadpadam zadźěwać. Francoska dyrbjała so na wobšěrne reformy a radikalne naprawy hotować. Dźensa je francoski ministerski prezident Edouard Philippe w Narodnej zhromadźiznje swój knježerstwowy program předstajił.
Dyrbja w dowolu doma wostać
Manuela Schwesig (SPD), dotalna zwjazkowa swójbna ministerka, je wot ...
Warnujapřed spionažu
Berlin (dpa/SN). Něšto dnjow do zahajenja wjerškoweho zetkanja G 20 wumjetuje němski wustawoškit někotrym wobdźělnikam zetkanja, kaž Ruskej, Chinje a Turkowskej, přiběracu spionažu w Němskej. „Ruska federacija, Ludowa republika China a Islamska republika Iran su hłowni akterojo přećiwo Němskej wusměrjeneje spionaže“, rěka w najnowšej rozprawje wustawoškita, kotruž je nutřkowny minister Thomas de Maizière (CDU) dźensa w Berlinje předstajił. W rozprawje mjenuja wustawoškitarjo w tym zwisku tež Turkowsku. Wosebje warnuja před spionažu w knježerstwowej štwórći stolicy Berlina. Rusku a Chinu su zamołwići w Němskej wospjet na internetnych atakach jako nadpadnikow spóznali, rěka w 300 stron wopřijacej rozprawje. „Dołhodobnosć a wuběr cilow na to pokazujetej, zo nadpadnicy spytaja politiku a zarjadnistwo zwjazkoweho sejma zaměrnje wuskušeć. To brizantne na rozprawje je: Ruski prezident Wladimir Putin kaž tež chinski prezident Xi Jinping staj hosćej wjerškoweho zetkanja G 20 w Hamburgu.
Trump chce Angeli Merkel pomhać
Berlin (dpa/K/SN). Prezident USA Donald Trump je wčera ze zwjazkowej kanclerku Angelu Merkel (CDU) telefonował. Zazwonił ju je, zo by jej připrajił, najebać kontrowersne nahlady nastupajo škit klimy a wikowansku politiku na wjeršku G 20 w Hamburgu ju podpěrać. Wuraznje jej zdźěli, zo so wjeseli w měsće Hansy jej pomhać wjeršk k wuspěchej dowjesć, kaž bě z Běłeho domu słyšeć.
Trump a Merkel rozjimaštaj we wobšěrnej rozmołwje tež temy kaž klimu a hospodarstwo, mjez druhim nadkapacity wocla po wšěm swěće. Diplomatiscy wobkedźbowarjo wšak z tym liča, zo so Trump ze swojimi nastajenjemi na wjeršku G 20 wo zwadu postara.
Brazilski prezident Michel Temer, kiž bě najprjedy zdźělił, zo na zetkanje 20 najwažnišich industrijnych a prohowych krajow njepřijědźe, so nětko tola na nim wobdźěli. Temer je doma podhlada korupcije dla wobskorženy a steji přiběrajcy pod politiskim ćišćom.
Pytaja za přičinami katastrofy
Po znjezboženju busa na awtodróze z 18 mortwymi
Münchberg (dpa/SN/MkWj). Dźeń po zahubnym njezbožu na awtodróze A 9, při kotrymž bě so bus dospołnje wupalił, pytaja fachowcy dale za přičinami katastrofy. Při tym chcychu so přežiwjenych prašeć, předewšěm jednoho z busoweju šoferow, kiž bě njezbožo přežiwił. „To drje njebudźe dźensa wotzamknjene“, zdźěli rěčnik hornjofrankskeho policajskeho prezidija. Strowotniski staw 30 zranjenych je dale njezměnjeny. Dwaj pasažěraj běštaj ćežke spalenja poćerpjełoj.
Njedaloko Münchberga pola bayerskeho Hofa bě bus wčera rano do stejaceho nakładneho awta zrazył a so hnydom zapalił. 18 sobujěducych w płomjenjach zahiny. Powostanki busa chcedźa kriminalnotechnisce přepytować. Wo přičinach katastrofalneho wohenja hišće spekuluja. Hač je hdy wuslědźa, njeje ani wěste, rěčnik policije zdźěli.
Kormoranowy karusel
To a tamne (04.07.17)
Jenož w kupanskich cholowach, z kupanskej čapku a płuwanskimi nawočemi chce 30lětny Joseph Heß 600 kilometrow samlutki po Łobju płuwać, wot čěskeje mjezy hač do Hamburga. Hospodarski inženjer ze Sakskeje planuje za to dźesać dnjow. Sobudźěłaćer Kamjeničanskeje TU dyrbješe sej dowolnosć w 15 institucijach wobstarać. Startować chce wón 4. awgusta w Bad Schandauwje.
Dweju rubježnikow dosahnył je policajski pos w münsterlandskim Dülmenje. Mužej běštaj so z dalšim komplicu do banki zadobyłoj. Swědk něšto słyšeše a zawoła policiju. Ta přijědźe z psom Casperom, kotryž ćěkacych muži přesćěhaše. Prěnjeho kusny do ruki, na čož so tón poda. Krótko po tym Casper tež druheho paducha wučušli. Třeći skućićel pak móžeše ćeknyć, byrnjež z helikopterom za nim pytali.
DJV namołwja Trumpa
Berlin (dpa/SN). Zwjazk žurnalistow Němskeje (DJV) prezidenta USA Donalda Trumpa namołwja „šćuwańcu přećiwo žurnalistam“ skónčić. Přičina su wospjetne ranjenja žurnalistow a najnowši widejo, hdźež Donald Trump muža bije, kotrehož hłowa je z logom sćelaka CNN zakryta. „Dźensa so Trump ze CNN nasadźa, jutře snano z korespondentami ARD a ZDF w USA“, rjekny zwjazkowy předsyda DJV Frank Überall. Žurnalisća njesměli so wot Trumpowych atakow wobwliwować dać.
Gabriel w golfowym regionje
Berlin (dpa/K/SN). Wosrjedź krizy Katara dla poda so němski wonkowny minister Sigmar Gabriel (SPD) do golfoweho regiona. Dźensa wječor wopyta wón Sawdi-Arabsku a Zjednoćene arabske emiraty (VAE). Wobaj stataj słušatej k štyrjom susodam Katara, kotrež su diplomatiske poćahi z małym, ale na naftu bohatym krajom přetorhnyli a k tomu hranicy zawrěli. Jutře budźe Gabriel w Katarje samym a srjedu w Kuwaiće, kotryž chcył w krizy posrědkować.
Pobrjóžny škit zesylnić
