Drježdźany (SN/MiR). Próstwa wo rozprawu knježerstwa na temu mjezy pře­sahowace kubłanje w rěči susodow zaběraše wčera Sakski krajny sejm. Wjetšina zapósłancow je předłoze frakcijow CDU a SPD a wotmołwje sakskeho statneho ministerstwa za kultus přihłosowała. Loni­ w septembru běštej frakciji próstwu stajiłoj, něhdźe měsac pozdźišo bě ministerka Brunhild Kurth (CDU) pisomnje wotmołwiła. Wčera wona před parlamentom rozprawješe. Jako wuspěšnu a nošnu inwesticiju za skutkowanje w pomjeznych kónčinach na polu rěčneho kubłanja ma Brunhild Kurth załoženje Sakskeho zarjada za zažne susodorěčne kubłanje w Zhorjelcu. Dale waži sej wona kooperaciske programy Interreg a wita, zo móža zajimcy na mnohich sakskich šulach pólšćinu a čěšćinu wuknyć, wosebje, zo wobsteja za wobě rěči wuwučowanske plany a zo móža šulerjo pruwowanja we woběmaj rěčomaj na wyšej šuli abo gymnaziju złožić.

Rownjanska gmejnska rada plan wo wuwiću wsy naćisnyła

Rowno (AK/SN). Po wozjewjenju najnowšich planow energijoweho zastara­ćela LEAG nastupajo wudobywanje brunicy žadaja sej Rownjenjo prawnisku wěstotu­ za zachowanje swojeje wsy, škitne naprawy přećiwo Wochožanskej wuhlowej jamje a podpěru Swobodneho stata Sakskeje za infrastrukturu. Tole je wjesny přestejićel Matthias Jainsch na posedźenju gmejnskeje rady w Slepom zawčerawšim, wutoru, w swojej rozprawje hišće raz po­twjerdźił. „Stanjemy so z direktnym susodom Wochožanskeje brunicoweje jamy, a to wjele lět. Poće­žowa­nja budu hoberske“, wón pod­šmórny.

Hranica 30 stopnjow je přewinjena: Němska wjedrarnja w Offenbachu je wčera dotal najhorcyši dźeń lěta namě­riła. Termometer wjedroweje stacije Geilenkirchen­ pola Aachena pokazowaše 30,1 stopjeń. W Trieru a Saarbrückenje naměrichu 30 stopnjow, nimale telko w Kölnje a Karlsruhe. Kónc tydźenja ma so zaso wochłódnić, po tym zo je njewjedrowa fronta na wuchod dale ćahnyła.

Perfektnje schował je so štyrilětny hólc a tak zasadźenje policije zawinił. Wón bě na swojich narodninach ze staršimaj „pytaj mje!“ hrał a so w staršiskim domje w pfalcskim Enkenbachu-Alsenbornje chětro derje schował. Na wołanje narodninskich hosći pak njereagowaše. Po poł hodźinje njewuspěšneho pytanja alarmowaštaj staršej policiju. Jako zastojnicy dojědźechu, bě pachoł hižo ze swojeho schowa wulězł a daše sej narodninski tykanc­ słodźeć. Hdźe bě so schował, wón wězo njepřeradźi.