Interview z Dirkom Rettigom a Falkom Kunzu
W nadawku sportoweje redakcije Serbskich Nowin je so Clemens Šmit někotre dny do kónca hrajneje doby 2014/ 2015 z trenarskim duwom prěnjeho koparskeho mustwa SJ Chrósćicy rozmołwjał.
Knježe Rettigo, wot přichodneje sezony njebudźeće hižo prěnje mustwo SJ Chrósćicy trenować. Prašenje „čehodla“ drje njeje runjewon wěc zjawnosće, móžeće pak přiwšěm někotre přičiny/dypki mjenować, čehodla so puće z Wašeho wida mjez Wami a Chróšćanami w přichodźe dźěla?
D. Rettig: Nó haj, što wšo je abo njeje internje běžało, k tomu so tule njewuprajam, dokelž to wězo wěc zjawnosće njeje. Mi běše wažne dóstać jasne znamjo ze stron towarstwa, po tym zo bě předsydstwo SJ Chrósćicy spočatk januara zdźěliło, zo njebudźe wone přichodnu sezonu hižo funkciju dale wukonjeć. Chcych wěstotu a krute struktury za klětu měć, tajke pak njeběchu so hač k wěstemu datumej dali, tak zo běše na kóncu snano lěpje, zo so zhromadne dźěło hač do 30. junija skónči.