Sokoł Ralbicy/Hórki –

SC Großröhrsdorf 1:0 (1:0)

Zestawa domjacych: Ch. Gloxyn – M. Matka (46. Korjeńk), Schultz, A. Wałda, T. Wałda, Rachela, D. Gloxyn, Šołta, Šewc, Nuk (70. Ričl), Domaška

Po njetrjebawšej poražce tydźenja w Budyšinje přećiwo Póstej Germaniji rěkaše doma přećiwo Großröhrsdorfej, sej tři dypki wuwojować. Hosćo z Rödertala mějachu do hry 26 ličakow na konće, runje tak kaž Sokoljo. Tuž wočakowachu 83 přihladowarjow runohódnu partiju.

A tajka so tež wot spočatka do kónca wuwiwaše. Na zbožo pak poradźi so domjacym hižo po štwórć hodźinje nawjedowanje. Dołhi bul škitarjo Sokoła wotpopadnychu a hrajachu jón hnydom kapitanej Dennyjej Gloxynej. Tón dołho nječakaše a kulowatu kožu ze 30 metrow do dołheho róžka přetwori, krasne to nawjedowanje. Sokoljo běchu hač do połčasa dale jenož přez standarty strašni, hosćo spytachu so dale z dołhimi bulemi. Tola na woběmaj bokomaj hrajerjo wjac wyskać njemóžachu.