Wuspěšna předjubilejna Jizerská pádesátka

Lětsa móžachu Jizersku pádesátku, najwjetše sněhakowarske wubědźowanje w Čěskej, pod dobrymi wuměnjenjemi přewjesć, dokelž bě so na zbožo w běhu tydźenja zaso sněžiło. Čary pak njejsu kóžde lěto jenak dołhe, wšako su sněha dla tak wuhotowane, kaž so hodźi. 25 kilometrow dołha distanca (JIZ 25) bě loni na přikład wo 2,5 km krótša. Lětsa wjedźeše JIZ 25 prěnje 9 km nimale jenož horu horje. JIZ 50 bě prěni raz w historiji woprawdźe 50 km dołha. Zamołwići postarachu so wo dobru organizaciju. Wšitko je perfektnje běžało, wšojedne hač na městnje, při wotewzaću podłožkow w Liberecu abo ze shuttle-busami z Libereca na městno wubědźowanja w Bedřichovje a zaso wróćo. Ze startowym paketom dóstachu sportowče a sportowcy tež dobropis za wobjed a jedne čěske piwo po wubědźowanju. Wšitcy wobdźělnicy, tak mjenowani finisherojo, dóstachu znowa škleńčanu medalju, wšako maja w Jizerskich horinach dołhu tradiciju škleńčerstwa.