Najebać lodowu zymu bě šwarna syła wulkich a małych Worklečanskich fanow puć do sportownje Wojerowskeho Lessingoweho gymnazija namakała, zo by swoje mužace mustwo Viktorije Worklecy III na 5. hrajnym dnju wolejbuloweje wokrjesneje klasy stafla sewjer podpěrała. A woni njebuchu přesłapjeni. Drje mějachu Viktorianorojo jenož mały kader k dispoziciji, tole pak z wysokej zasadźenskej hotowosću wurunachu. A Marko Njek bě tak prěni raz w „starting-six“ zasadźeny.
ST Viktoria Worklecy III – VF Módro-běli Wojerecy III 2:0 (25:16, 25:9)
Na spočatku partije přećiwo rutinjejam VF BW Wojerecy III tčeše wšitkim hrajerjam hišće zyma w porstach. Tež na tepjenju dyrbi so tu a tam wočiwidnje lutować. Tak njeporadźichu so najprjedy někotre přiwzaća, tola z přiběracym časom hry buchu hrajne ćahi stabilniše a tłóčaca přewaha Worklečanow widźomna. Hrajne ćahi wotběžachu kaž na šachowej desce a wšitcy nadběhowarjo móžachu so pola přistajerja Marcela Rjelki za precizne přihraća podźakować. 25:16 rěkaše jasny rezultat k změnje stronow.
