Po dwulětnej přestawce wuhotowachu stari knježa Sokoła Ralbicy/Hórki zaso swójski halowy koparski turněr. Zwjeselace bě, zo so wšitke přeprošene mustwa wobdźělichu. Tak nastupichu cyłki SJ Njebjelčicy, ST Marijina Hwězda, Zeleno-běli Hórki a zakitowar pokala SJ Chrósćicy. Sokoljo stajichu dwaj cyłkaj. Hraješe so po modusu kóždy přećiwo kóždemu, a to stajnje dźesać mjeńšinow. Wšitke hry sudźi nazhonity sudnik Jan Hrjehor.
Prěnjej dwě hrě rozsudźichu Ralbicy I, Hórki a Chróšćenjo za sebje a stejachu ze šěsć dypkami na čole tabulki. Wotnětka bu turněr jara zajimawy. W třećej hrě nastupi domjacy prěni cyłk přećiwo Hórkam. Hra skónči so njerozsudnje bjez wrotow. Prěnju poražku pak poćerpichu Chróšćenjo w bojowniskej hrě přećiwo Ralbičan druhemu mustwu. Wuslědk běše na kóncu 2:0. Marijina hwězda doby tydźenja bulowu nóc, to pak njeměješe z wukóncom turněra wjele činić, dokelž někotři stajni hrajerjo pobrachowachu.
Łužiske lodohokejowe liški –
EV Landshut 2:3 p.p.
(0:1; 2:0, 0:1 - 0:1)
Započała bě so partija z wida Liškow derje. Domjacy přewzachu ceptar a Landshut kasěrowaše hižo zahe dwě chłostani. To měještaj Lane Scheidl a Clarke Breitkreuz dwě dobrej składnosći. Vogl we wrotach hosći pak je wotwobara. Jako domjacy potom bjez nuzy tarč zhubichu a hosćom telko časa a městna dachu, to přetwori Samir Kharboutli swobodnje a bjez prócy k 1:0.
Tež na spočatku srjedźneho wotrězka mějachu Liški najprjedy někotre lěpšiny. Po Scheidlowym předdźěle dósta kapitan Breitkreuz dwě dobrej móžnosći, tute pak njepřetwori. Potom dźěchu Liški prěni raz do podličby. Bosćij Zauner dyrbješe na chłostansku ławku. Hunter Garlent pósła Lane Scheidla na jězbu, kiž so wo wurunanje postara. Bórze pak dyrbješe Garlent na chłostansku ławku. A nimale by so stawizna wospjetowała. Jan Nijenhuis nastupi, wot kapitana posłužowany, k soloběhej a wuhra tež wrotarja Vogla. Wrota k 2:1 padnychu pak hakle, hdyž bě Garlent tři sekundow wróćo na lodźe. Potajkim njeběchu to druhe wrota z hrajerjom mjenje na hrajnišću.
EC Bad Nauheim –
Łužiske lodohokejowe liški 3:1
(1:0, 0:0, 2:1)
Hosćićeljo z Bad Nauheima hnydom wot spočatka ćišć wukonjachu. Bě to spěšna hra, ale bjez smjerćstrašnych akcijow. Hakle wotfalšowana třělwa Huby Sekesija postara so wo strach před wrotami Liškow. Nadběhi Běłeje Wody běchu skerje rědke, tola druhdy bu tež za Feliksa Bika strašne. Jako njemóžachu hosćo puk ze zakitowanskeho pasma wuhnać, wotćahny Patrick Seifert z módreje linije. Kevin Schmidt do směra wrotow wotfalšowa a Christoph Körner suny tačel k 1:0 přez wrotowu liniju. Dokelž so na lodźe hewak ničo dale njestawaše, dźěše tež ze snadnym rezultatom do prěnjeje přestawki.
ST Radwor –
ST Horni kraj Sprjewja 1:4 (0:2)
Zestawa domjacych: Grenzemann – Reinecke, Pěčak, M. Grubert, Paška, Castejon (83. Mička), Schöne (70. Wjeńka), Wjacławk, Schulze, Hetaš (46. Nuk), Šnajder
Prěnja wot dweju nachwatanskeju dypkoweju hrow bě so hnydom přećiwo jara sylnemu přećiwnikej přewjedła. Radworčenjo a swoji trenarjo spytachu najlěpše docpěć.
W prěnim połčasu móžeše Radworske mustwo derje sobu dźeržeć. Tak prawje pak na započatku do dwubojow njepřińdźechu a tak wjele bulow zhubichu. Hnydom w dźesatej mjeńšinje móžeše Mecir z jara dobrym wólnym kopom ze zdalenosće 20 metrow nawjedowanje k 1:0 docpěć. Defensiwa domjacych dyrbješe so nětko hišće raz rjadować. Tak běchu tež někotre situacije pódla, w kotrychž sudnik na zbožo na jědnatku njepokaza. Po zbožu pak sćěhowaše potom tola hišće pokutny kop, kotryž zaso Mecir k 0:2 (26.) přetwori. Wulku šansu na skrótšenje wuslědka měješe Johannes Wjacławk, jako běžeše sam na wrotarja. Wón pak njemóžeše dypkować, dokelž jim čuwy zaprajichu.
Předsyda Domowiny Dawid Statnik so při mytowanju wjeseleše, zo je w rjadach dwanaće nastupjenych cyłkow tójšto nowych, ale tež tójšto znatych mjezwočow widźeše. Po třilětnej přestawce trjebaše wolejbulowe wurisanje tajke něšto kaž nowy start, wšako w lětach 2020, 2021 a 2022 wo Pokal Domowiny hrali njejsu. Tuž njezadźiwa, zo bě so jenož jědnaće cyłkow přizjewiło. Hakle pozdźišo, na próstwu Serbskich Sokołow, nastajichu serbscy studenća dwanaty cyłk. Mała ličba mustwow pak wotběhej turněra chětro tyješe, wšako bě kóžde mustwo hač do kónca wužadane a nastajnosći hraješe. W cyłkownje dwanaće přechodach na třoch hrajnišćach nastupi kóždy cyłk šěsć razow. Kóžda hra měješe stajnje dwě sadźbje hač do 15 dypkow. Tu wuslědki předkoła:
Stafla A – předkoło
1. Škit Budyšin 80:68 10:2
2. SGB 11./12. lětnik 88:57 8:4
3. Rapaki 66:80 4:8
4. SGB 12./11. lětnik 60:89 2:10
Stafla B – předkoło
1. Serbscy studenća 89:66 10:2
2. ST Radwor 87:74 8:4
3. Wučerjo Ralb./Work. 73:82 6:6
4. Mustwo 1296 63:90 0:12
Stafla C – předkoło
1. Tachantstwo Budyšin 90:53 12:0
2. Bratrowstwo Róžant 79:53 8:4
3. SGB 10. lětnik 60:86 2:10
4. Ataktikarjo 12-94 49:86 2:10
Awtor dźensa
Tereza Wićazowa
Zwjetša je z tradiciju, zo sej hrajerjo po aktiwnej karjerje rólu trenarja přiwzaja. Tuž nastanje prašenje, hač móže jenož dobry hrajer so z dobrym trenarjom stać? Wšako maja móžnosć, jich wědu a nazhonjenja dale sposrědkować. Paradowy přikład za to je Franz Beckenbauer, kotryž je jako hrajer kaž tež nazwučowar swětowe mišterstwa dobył. Napřećiwny přikład je Lothar Matthäus, kotryž bě drje wuspěšny hrajer, ale jako trenar njeje móhł pře wulke wuspěchi docpěć. Je pak tež dosć nazwučowarjow, kotřiž drje kedźbyhódnu hrajersku karjeru njepokazachu, ale přiwšěm w profijowym businessu wuspěšni běchu. Na přikład Thomas Tuchel, kotryž drje jako hrajer pře wusahowacy njebě, ale jako trenar je na přikład z mustwom Paris Saint-Germain dočasnje mišterstwo a z FC Chelsea champions-league dobył. Wuspěšniši bě José Mourinho, kotryž smědźeše so jako hrajer jenož w druhej portugalskej lize na někotrych partijach wobdźělić. Jako trenar zamó wón z FC Porto a Inter Mailand champions-league dobyć.
Stara garda w Delanach
Dźensa wječor wot 18 hodź. hraje w Ralbicach stara serbska koparska garda. Zarjadowar a wuhotowar budźe cyłk starych knjezow Sokoła Ralbicy/Hórki. Woni su sej mustwa Zeleno-běłych Hórki, ST Marijineje hwězdy, SJ Njebjelčicy a SJ Chrósćicy přeprosyli. Sami chcedźa Sokoljo dwaj cyłkaj stajić.
Wo pokal Domowiny
Serbscy Sokoljo třěšneho zwjazka serbskich sportowčow a sportowcow, přewjedu jutře, wot 9 hodź. 38. sokołski wolejbulowy turněr wo pokal Domowiny. Na wurisanju wobdźěli so dwanaće wolejbulowych cyłkow, zakitowar pokala, Serbski dom, njeje so přizjewił.
Winowatostne koparske hry
Prěnje koparske mustwo ST Radwor ma njedźelu dypkowu hru nachwatać. Hrać budźe so w Budyšinje na kumštnym trawniku na Thrombergowej.
04.02. 13:30 SV Módro-běli Zorbau –
Budissa Budyšin
05.02. 13:00 ST Radwor –
ST Horni kraj-Sprjewja
Přihotowanske koparske hry
04.02. 09:30 FSV Budissa Budyšin –
SJ Chrósćicy (młodź. A)
04.02. 14:00 Sokoł Ralbicy/Hórki –
HZ Wóslink/Skaskow
Dowolnosće w Jěžowje dóstać
Łužiske lodohokejowe liški –
Krefeldske pinguiny 0:4
(0:1, 0:3, 0:0)
Tež na pjatku běchu Łužiske liški w lisćej jamje zaso za pukom honili, tola woni njedocpěchu žane wrota přećiwo Krefeldskim pinguinam a poćerpichu poražku 0:4. Do wuslědka hodźi so interpretować, zo wotběža partija chětro jednostronsce, štož pak cyle tak njetrjechi. Wšako mějachu Běłowodźenjo jara wjele dobrych wokomikow a swój podźěl na přewšo zabawnej mišterstwowej hrě. Dwě wěcy na kóncu wo rozdźělenju dypkow rozsudźištej. Mjeztym, zo so domjacy, we wuwostajenju najlěpšich móžnosćow za docpěće wrotow, jónu bóle přetrjechichu, dowolichu woni hosćom, pře wjele třělwow z módreje linije, bjeztoho zo bychu swójski slot pod kontrolu měli. Wotfalšowana tarč a tři reeboundy rozsudźichu wo jasnym dobyćerju. Wrota za hosći docpěchu Marcel Müller, Victor Knaub a dwoje Dennis Miller. Kilian Hrjehor
Tabulka, lodohokej, DEL 2
1. EC Kassel Huskies 41104
2. ESV Kaufbeuren 4178
3. Ravensburg Towerstars 4274
4. Krefeldske pinguiny 4269
5. EC Bad Nauheim 4268
6. Lodowe lawy Drježdźany 4266
Cyłkownje 14 hrajerjow Chróšćanskeho prěnjeho mustwa běchu minjeny kónc tydźenja zhromadnje z trenarjom Pavelom Runtom swoje zymske treningowe lěhwo w Čěskej přewjedli.
Po tym zo běchu koparjo štwórtk w Jablonecu přenocowali, podachu so nazajtra z ćahom do Pólskich Jakuszyc (Jakuszyce). Wot tamnišeho Delnjošleskeho sportoweho centra „Polana Jakuszycka“ wočakowaše jich něhdźe 35 kilometrow dołha čara do Bedřichova, hdźež běše zdobom kwartěr Chróšćanow za přichodnej dwaj dnjej. W minjenym času bě so w Jizerskich horinach mnoho sněžiło, tak zo běchu wuměnjenja za sněhakowanje na dołhich čarach powšitkownje dobre. Jenož jedyn mały wotrězk čary běše chětro zalodźeny, tak zo dyrbjachu koparjo tu swoje sněhaki do rukow wzać.