Wjac hač 300 wobdźělnikow naročnu čaru 50 kilometrow zmištrowało

Hórki (MkWj/SN). Cyłkownje 350 běharkow a běharjow je so předwčerawšim, sobotu, na mjeztym pjaty Slawijamarš po dwurěčnej Łužicy podało. To je telko kaž hišće nihdy. Wočiwidnje ma naročny běh přez 50 kilometrow lěto a wjace přiwisnikow tež zwonka Łužicy. Start a cil běštej lětsa zaso na Hórčanskim sportnišću.

Organizatorojo wokoło Fabiana Šěraka, Mateja Wjeńki, Marie-Luisy Wjeńcyneje a Leoni Matješkec běchu čaru zestajeli, kotraž wjedźeše wobdźělnikow najprjedy z Hórkow do Wětrowa a dale přez Łuh a Chasow do Radworja. Na tamnišej kupje bě prěnja stacija z pomazkami, kofejom a wšelakim sadom přihotowana. Wjedro bě zarjadowanju lětsa skerje přichilene: Mjeztym zo běchu so loni z wulkej horcotu bědźili, běchu temperatury tónraz znjesliwe. Za to pak šwihele wobdźělnikow stajnje zaso jara rozdźělnje trjechichu: Někotři přińdźechu přemokani na stacije, druzy běchu porno tomu lědma wot dešća potrjecheni.