Sokoł Ralbicy/Hórki – Drohotka Ramnow 1:4 (0:1)
Zestawa domjacych: Schöne – Schultz, Wałda, Bjeńš, Materna (85. Lešawa), Rawš, Gloxyn, M. Matka (42. K. Matka), Šiman, G. Kurjat (69. M. Kurjat), Domaška
Koparjo Sokoła Ralbicy/Hórki hromadźa w tej sezonje radšo wonka dypki, doma wšak wočakuja w prěnjej połseriji stajnje najsylnišich cyłki tuteje ligi. Kulowej běchu 1:2 podleželi, 2:2 hrajachu přećiwo Hornjemu krajej nad Sprjewju, a nětko dóstachu sej njedźelu wot Drohotki Ramnow samo z 1:4 na měcu.
Wot spočatka Ramnowčenjo pokazachu, zo słušeja lětsa k wulkim faworitam na mišterstwo. W Ralbičanskej połojcy woni přeco z dwěmaj mužomaj atakowachu a sej tak spěšnje zaso bul wudobywachu. Po tym kombinowachu so wutrajnje na wrota Willija Schöny. Po jeho zmylku w 15. min. steješe tež hižo 0:1. Flanku Schöne prawje njezapřimny, a wotplacnjeny bul stłóči hóstny nadběhowar jenož hišće přez liniju. Z wulkotnymaj refleksomaj zadźěwa Ralbičanski wrotar na to hnydom dwójce wjetšemu zastatkej. Sokoljo mějachu jenož jeničku prawu móžnosć. Po róžku zhłójčkowa Bosćij Bjeńš bul na łatu. Z 0:1 dźěchu hosćićeljo do kabiny.