Po tym zo někotři hrajerjo FC Energiju Choćebuz po lěćnej přestawce wopušća (mjez druhim Robert Müller, Jonas Zickert, Orhan Yildirim a Abdulkadir Beyazit), su zamołwići FC Energije na transferowych wikach wuspěšni byli a dweju noweju koparjow angažowali.
Prěni „nowy“ je Patrick Storb, kiž přińdźe wot U 23 Hamburgskeho SV do Łužicy. 22lětny ma nazhonjenja z połsta hrow w regionalnej lize na sewjeru Němskeje. Storb je 1,92 metrow wulki a w škiće mnohostronsce zasadźomny.
Z nadběhowarjom Nilsom Stettinom je so minjeny tydźeń hrajer mustwa FSV Union Fürstenwalde Energiji Choćebuz přizamknył. W Berlinje rodźeny je w dorosće na wjacorych městnach w stolicy hrał. 23lětny nadběhowar ma nazhonjenja ze 118 partijow w regionalnej lize. W nich je wón 20 wrotow třělił a wosom razow wrota spřihotował. Ze swojimi 1,93 metrami budźe Stettin poboku Felixa Brügmanna w nowej hrajnej dobje na wrotowej hońtwje zasadźeny.