Wučerske mustwo Serbskeho gymnazija Budyšin (SGB) je 29. koparsku hru přećiwo lětušim maturantam 3:2 snadnje dobyło. Čisty hat-trick poradźi so młodemu pedagogej Bosćijej Bejmje.
Po pjeć poražkach zasobu poradźi so wučerjam-koparjam SGB skónčnje zaso dobyće přećiwo swojim dwanatkarjam. Při rjanym słónčnym wjedrje skónči so 29. koparski duel po dwójce 15 mjeńšinach ze snadnym dobyćom 3:2 staršeje generacije. Před 18 lětami běchu pedagogojo ze samsnym rezultatom wuspěšni a wobě hrě matej kurioznu zhromadnosć. Srjedu, 16. junija 2004 bě młody wučer za sport a stawizny René Wjacławk, nětko šulski nawoda Serbskeho gymnazija, čisty hat-trik docpěł. Tydźenja bě to młody wučer za sport a geografiju Bosćij Bejma, kotryž wšitke tři wrota třěli. Wobaj staj rodźenaj Ralbičanaj.