Najstarša šulerska starobna skupina bičwolejbula je w Sprjewinej kupjeli regionalne finale přewjedła. Šulerki a šulerjo 10. a 11. lětnika Serbskeho gymnazija Budyšin (SGB) dobychu we wurisanju „Młodźina trenuje za olympiju“ mjez třomi šulemi złoto a kwalifikowachu so za sakske finale w Drježdźanach.
Při rjanym słónčnym wjedrje wotmě so wuchodosakske finale bičwolejbulistow w starobnej skupinje II w Budyskej Sprjewinej kupjeli. Po dobyću młódšich wuknjacych SGB (SN rozprawjachu) radowachu so nětko tež šulerki a šulerjo 10. a 11. lětnika z kapitanom Eliasom Kummerom nad złotom. Tež woni pojědu 26. junija do krajneje stolicy, zo bychu w sakskim finalu sobu wo medalje wojowali.
