SJ Njebjelčicy –

ST Kinspork/Łužnica 5:3 (1:2)

zestawa domjacych: Gerlach - Hrjehor, Wjerš, Šram (65. Marticke), Wjacławk (79. Čornak T.), Čornak R. (77. Wätzig), Zarjeńk (90. Reineke), Plaettner, Korjeńk, Krawčik, Rudolf

25 stopnjow celsiusa, słónco, wosom wrotow a domjace dobyće. Što chceš wjac? To běchu mysle něhdźe 120 přihladowarjow na domjacej hrě Njebjelčanow přećiwo Sportowemu towarstwu Kinspork/Łužnica. Partija bě so z wysokej intensitu, ale z poměrnje mało šansami na wrota na woběmaj bokomaj započała.

Zazběh słušeše Handrijej Korjeńkej, kotryž swobodnje na wrota běžeše, potom pak na wrotarju zwrěšći. Kak to lěpje dźe, Korjeńk něšto mjeńšinow pozdźišo pokaza. Po dwójnym pasu z Williamom Plaettnerom předrě so Plaettner na prawym křidle a połoži bul prěki na Korjeńka, kotryž jón přez wrotowu liniju k 1:0 (31.) suny. Wurunanje pak slědowaše ani mjeńšinu pozdźišo. Direktnje po zakopje wurunachu Kinsporkčenjo z dalokej třělwu 1:1 (32.). Dotal wurunana hra bě nětko na stronje hosći. Woni zesylnichu ćišć na čerwjene košle. Hišće do połčasa hosćo na 2:1 (38.) zwyšichu.