Sokoł Ralbicy/Hórki II
– ST Radwor 1:2 (1:1)
Zestawa domjacych: J. Bjeńš – Schultz, Kř. Matka (72. Šołta), Bogusz, Lulak, Jakubaš, Šěn (89. Serbin), Šwejda, Kobalc, Gerlich (82. M. Matka), J. Matka
Zestawa hosći: Ch. Šěrak – Henka, F. Šěrak, Zähr, Schulze, Omran, Zimmermann, Winar, Kurjat (58. Buša), Nuk, von Karwin
Byrnjež so minjeny pjatk dešćowało, běše móžno na Ralbičanskim trawniku kopańcu hrać. Z trenarjom Pětrom Bejmakom a koparjom Měrćinom Kurjatom móžachu w Delanach tež dweju znateju Sokołow witać. Radworčenjo móhli z dobyćom zastatk na prěnjeho, HZ Hórnikečanski jězor, na šěsć dypkow pomjeńšić. Načolnik tabulki běše dźeń do toho přećiwo Lubušej přěhrał.
Wokrjesna koparska liga, stafla II
Ćisk II – Wojerowski FC II 3:1 (1:0)
Ralbicy/Hórki II – ST Radwor 1:2 (1:1)
Łuty – Njeswačidło6:0 (6:0)
1. HZ Wulke Ždźary 18 46 : 23 40
2. HZ Łaz/Běły Chołmc 18 43 : 22 35
3. ST Radwor 18 58 : 22 34
4. ST Ćisk II 18 33 : 26 32
5. FSV Łuty 18 37 : 22 29
6. ST Lubuš 18 36 : 26 27
7. LSV Hory II 18 30 : 33 23
8. Nowe Město n. S. II 18 26 : 35 23
9. Rakečanske ST II 18 23 : 35 21
10. Nadrózna Hrabowka 18 29 : 39 20
Wokrjesny sportowy zwjazk je njedawno najbóle sportowsku šulu wokrjesa Budyšin wuznamjenił. Jedyn z pokalow přija za Serbsku wyšu šulu „Michał Hórnik“ Worklecy sportowy wučer Křesćan Bejmak. Šulerjo-sportowcy wudobychu sej w swojej kategoriji 3. městno.
Dohromady je so loni 24 šulow z wokrjesa na šulerskim wubědźowanju wobdźěliło. Z 5 500 wobdźělnikow zaruči sej wjac hač 3 300 šulerjow złote, slěborne a bronzowe sportowe znamješko. Tak tež Worklečanska wyša šula. Mjez wobdźělenymi wyšimi šulemi a gymnazijemi Budyskeho wokrjesa wjesela so Worklečenjo nad 3. městnom a pjenježnym mytom 200 eurow. 160 Worklečanskich šulerjow-sportowcow wuwojowa sej 81 čestnych znamješkow – 27 złotych, 45 slěbornych a dźewjeć bronzowych. Druhe městno wobsadźi Lessingowy gymnazij Kamjenc, a dobył je Leona Foucaltowy gymnazij Wojerecy. Jednaćel wokrjesneho sportoweho zwjazka Lars Bauer počesći dobyćerjow w krajnoradnym zarjedźe zhromadnje z 1. přirjadnikom krajneho rady Udom Wićazom.
OSC Lubij – Viktoria Worklecy 3:0 (25:20, 26:24, 25:18)
Wo małym dźiwje bychmy tu pisali, bychu-li Worklečanscy volleyballisća na poslednim hrajnym dnju wobwodneje ligi hišće titul mištra sej wubědźili. Při dobyću 3:0 by načolnik Koblicy runočasnje 0:3 přěhrać dyrbjał. Ale woboje so njesta!
ST Marijina hwězda
– SV Hermsdorf 1:2 (1:0)
Zestawa domjacych: O. Schmidt – Czapik (80. Hübner), Rab, Škoda, Smoła (65. Njek), Wróbl, Łušćanski, Jurš, P. Schmidt, Pakoßnick (24. Winkler), Peschmann
K duelej tabulkoweju susodow a zdobom zestupneju kandidatow witaše ST Marijina hwězda njedźelu popołdnju před domjacym publikumom koparjow z Hermsdorfa. Cil hosćićela běše dobyće, zo by kontakt k mustwam w srjedźnym polu dale wobstał. To pak chcyše tež hósć. Z třomi dypkami je tón ST Marijinu hwězdu w tabulce nětko přesćahnył.
W prěnjej štwórć hodźinje so ničo naspomnjenjahódneho njesta, a w 16. min. poradźi so domjacym 1:0. Po rjanej kombinaciji přez stacije Stanij Smoła a Matijas Wróbl dósta so bul k Jakobej Pakoßnickej, kiž přećiwnika wuhra a nisko přetwori. Bohužel pak dyrbjachu třělca wrotow krótko po tym wuměnić, štož bě zdobom łamk w ofensiwnych akcijach Pančičanow. Hra wotměwaše so dale přewažnje w srjedźnym polu. Wobaj cyłkaj pak wubědźištej sej přiwšěm někotre móžnosće. Najwjetšu tajku mějachu hosćo w 26. min., jako hrajer ze sydom metrow njetrjechi. Wrotar Oliver Schmidt třělwu wotwobara.
FV Drježdźany 06-Laubegast
– SJ Chrósćicy 7:1 (3:1)
Zestawa hosći: Králíček – Pöpel, Cyž, Sentivan, Šafář, Młynk (56. F. Zahrodnik), Schulze (62. Teichmann), Henčl (71. M. Zahrodnik), Runt, Žur, Věchet
Po tym zo běchu sej koparjo mustwa SJ Chrósćicy w domjacej hrě z remisom 1:1 přećiwo sylnemu cyłkej z Laubegasta hišće dypk zawěsćili, je jich w Drježdźanach druhi tabulki jasnje deklasěrował. Hižo wot prěnjeje mjeńšiny běžeše ofensiwna mašina hosćićela z wulkim ćišćom. Tak njetraješe dołho a hižo ležachu Chróšćenjo w zastatku (8.). Petr Králíček a Bosćij Cyž běštaj so njedorozumiłoj, nadběhowar so podźakowa a trjechi do čorneho. Chróšćenjo pak tłóčachu na wurunanje. Po wjacorych stacijach w šěsnatce dósta so bul k Radimej Věchetej, kiž jón k 1:1 za liniju stłóči (17.). Z dalšim nadběhom pak zhubichu hosćo w ofensiwje bul. Domjacy konterowachu a akciju zymnokrejnje k 2:1 zakónčichu (34.). Znowa so Chróšćenjo do hry nawróćichu a bychu nimale swoje druhe wrota docpěli. Věchetowu třělwu pak zamó wrotar z wuběrnym refleksom parěrować. Po róžku na tamnej stronje dósta so znowa Drježdźanski hrajer k bulej a powjetši předskok na 3:1 (45.+1).
Sokoł Ralbicy/Hórki
– Wojerowski FC 3:1 (1:1)
Zestawa domjacych: Ch. Gloxyn – Rawš, Zynda, Korjeńk, B. Bjeńš, Šewc, D. Gloxyn, Bejma (42. Wowčerk), Wałda (86. Matka), S. Bjeńš (70. Kurjat), Domaška
W Ralbičanskim Stadionje přećelstwa steještej sej wčera dotal hišće njeporaženej koparskej mustwje lěta 2017 napřećo. Wot spočatka tłóčachu Sokoljo na nawjedowanje, kotrež so jim w 9. min. poradźi. Flanka z lěweho boka docpě Pětra Domašku, kiž wušiknje přetwori. Dalše šansy sej domjacy derje nadźěłachu, před wrotami pak přehusto z poslednjej koncentraciju njedohrachu. Po róžku steješe na přikład Fabian Korjeńk samlutki w šěsnatce, w poslednim wokomiku pak škitna noha Wojerowčana wjetšemu zastatkej zadźěwa. Hósć namaka so poněčim lěpje do hry a sej tu abo tamnu šansu nadźěła. Krótko do połčasa rozsudźi sudnik nadobo na jědnatku za Wojerowčanow. Bosćij Bjeńš kopny bul před wrotami preč, jeho přećiwnik čuješe so trjecheny a hižo sudnik hwizdaše. Wšitcy w stadionje hladachu na so a njemóžachu wěrić, zo steješe nadobo 1:1. Gloxyn bě drje z porstami hišće při bulu, kulowata koža pak bě přewótrje třělena.
Serbscy sportowcy a přećeljo so mje přeco zaso prašeja, kak sym k běhanju na srjedźnych a dlěšich čarach přišoł. Tuž k tomu tule někotre informacije: