Awtor dźensa
Jan Hrjehor
Sym pjeć dnjow w conje FC Hansy Rostock, a to jako přiwisnik Dynama Drježdźany – konstelacija to kaž dynamit! Njepřeradźu pak so, ničo na to njepokazuje, zo sym fan čorno-žołtych. A to je tež lěpje tak. Njetraje mjenujcy dołho, a wuhladam na hrajkanišću swójbu: šikwanu žonu a zbožowne dźěći. Na prawym nadłochću nana-plěchača pak widźu wulki tattoo, kotryž pokazuje na fana FCH. Njemóžu pak přiwisnika do praweho lěhwa přirjadować. Pola FC Hansy maja mjenujcy tři fanowe skupiny. Normalny přiwisk, skupinu ultrafanow a k tomu hišće wulku črjódu hooliganow. Cyły čas swójbu wobkedźbuju a prašam so, što budźe pozdźišo ze zbožownych dźěći, hdyž snano raz zhonja, zo je nan ultrafan FC Hansy Rostock abo samo hooligan?