Widźał, słyšał, napisał (20.04.20)

póndźela, 20. apryla 2020
artikl hódnoćić
(0 )
Awtorka dźensa Tereza Wićazowa

Hdyž swoje sportowe rozprawy za wolejbul pisam­, hladam tež hdys a hdys rady za tym, kak su mustwa dotal hrali abo hdźe běchu respektiwnje su mustwa w tabuli zaměstnjene. Zajimawe je potom wosebje, hdyž po tabuli a na dypki hladajo słaby přećiwnik přećiwo sylnemu dobudźe. Myslu na přikład na wolejbulistki Schönbachskeho VV, kiž su w zašłej hrajnej dobje we wo­krjesnej klasy hrali a nětko we wob­wod­nej klasy. Přirunajo z wolejbulistkami dru­­heho zastupnistwa hrajneho zjed­no­ćenstwa Pančicy-Worklecy maja holcy a žony z Pančic a Worklec hrajne nazhonjenja we wobwodnej lize. Potajkim dwě lize rozdźěla. Po statistice a teoriji bychu Pančanki-Worklečanki faworit za hru ­byli. Tola wukónc hry běše jasne dobyće z 3:0 za pozdatnje słabše mustwo. Tajke zjawy dožiwiš tež w profesionelnym sporće, kaž na přikład na polu kopańcy w zwjazkowej lize. Wosebje w pokalnych hrach. Tam stejitej sej hdys a hdys mu­stwje z wšelakorych ligow napřećo. Konkretny přikład: W pokalnym štwórćfinalu Němskeho koparskeho zwjazka DFB spočatk měrca steještej sej 1.

FC Saar­brücken a Fortuna Düsseldorf napřemo. Što je to wosebite na tym? Nó, Saarbrücken hraje w regionalnej lize juhozapad, potaj­kim w štwórtej lize a Düsseldorf w 1. zwjazkowej lize. Jasny faworit bě potajkim Düsseldorf, wšako je to tři ligi rozdźěla. Tola Saarbrücken bě Düsseldorf z 8:7 po třělenju jědnatkow přewinył. A na kóncu liči wšako wuslědk..

Ale što su přičiny za to? Kak móže tak mjenowany underdog faworita přewinyć? Hustodosć je to nastajenje a sportowa psychologija. Jako přihladowar widźiš jenož hrajerjow, kiž hru hraja. Ale nic to, što so woprawdźe w pozadku abo snano samo w přihoće stawa. Na přikład je dźensa widejoanalyza móžna. Potajkim móže sej mustwo w předpolu přećiwnika dokładnje wobhladać, jeho analyzować a sylnosće kaž tež słabosće wuslě­dźić a so na nje taktisce nastajić a přihotować. Dale njesteji underdog pod wonkownym ćišćom. Přihladowarjo a medije wočakuja skerje, zo faworit hru za sebje rozsudźi.

A wosebje wažny dypk je motiwacija. Motiwacija z boka trenarja kaž tež mjez hrajerjemi hraje při tym wažnu rólu. ­Jó­nu wonkowny pohon, kaž na přikład wot fanow, kiž móže so pozitiwnje wuskutkować, abo tež nutřkowne nasta­jenje, pod motom: „Ach, my tak a tak přěhrajemy“, je hižo k njewočakowanym dobyću přećiwo faworitej wjedło. Wšako njeje nihdźe na swěće mustwa, kotrež hdys a hdys njedosahaceho nastajenja dla hru přěhraje.

Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND