Koparske towarstwo Dynamo Drježdźany słuša we wuchodnej Němskej k najwoblubowanišim sportowym towarstwam. Tež w Serbach Dynamowcam tójšto ludźi palcy tłóči, dźe-li wo dobre zaměstnjenje w tabulce druheje zwjazkoweje ligi.
Někotři Serbja su samo za towarstwo Dynama aktiwni a tam přistajeni. Tak trenuje wot lońšeho Njebjelčan Tadej Cyž z juniorami U 13 Dynama. Dalši Serb je 35lětny rodźeny Kaščan Matti Bětnar. Poprawom je wón přistajeny Drježdźanskeho uniklinikuma, a to jako fachowy lěkar w ortopediji a njezbožowej chirurgiji. Připódla pak wukonja wot lońšeho tež funkciju zastupowaceho lěkarja za profijowe koparske mustwo Dynama Drježdźany. Tak potajkim na hrach Dynama medicinske zastaranje hrajerjow sobu zamołwja.