Napjata kónčna faza koparski duel rozsudźiła

štwórtk, 26. septembera 2019
artikl hódnoćić
(0 )
Přeco zaso dyrbjachu so Chróšćenjo před swójskimi wrotami wuswobodźić. Tu poradźi so to Pavelej Runtej (štwórty wotlěwa, Chrósćicy) Foto: Jörg Stephan Přeco zaso dyrbjachu so Chróšćenjo před swójskimi wrotami wuswobodźić. Tu poradźi so to Pavelej Runtej (štwórty wotlěwa, Chrósćicy) Foto: Jörg Stephan

SJ Chrósćicy – ST Fortuna Trjebin 2:3 (2:1)

Zestawa domjacych: Králíček – B. Cyž, Sentiwan, F. Cyž, L. Zahrodnik, G. Zahrodnik, Runt, Feliks Zahrodnik (73. Mark), Henzl (82. Bogusz), Zynda (46. Matješk), M. Zahrodnik

Na rjanej słónčnej njedźeli bě koparske mustwo Fortuny z Trjebina do Chrósćic přichwatało. W zašłej hrajnej dobje móžachu Chróšćanscy koparjo wobaj duelej přećiwo cyłkej ze srjedźneje Łužicy dobyć. Po špatnym starće do sezony tuž rěkaše, zo měli woni wšitke tři dypki doma zdźeržeć. Na trawniku steješe po dołhej zranjenskej přestawce zaso Feliks Zahrodnik, z čimž so opcije w srjedźnym polu polěpšichu. Start so domjacym derje poradźi. Z kompaktneje defensiwy spytachu woni hru natwarjeć a ze spěšnymi přihrawkami k šansam dóńć. Prěnju tajku měješe Maksimilian Zahrodnik. Jeho bul pak wot žerdźe zaso wróćo do pola skoči. Mjeńšiny pozdźišo pak móžachu skónčnje wyskać. Wólny kop Pavela Runta Miroslav Sentivan do wrotow po­dlěši. Tak steješe w 10. min. 1:0. Nětko Trjebinjenjo wotućichu a spytachu přez spěšnych wonkownych hrajerjow wuspěch docpěć. Dokelž domjaca defensiwa derje steješe, pospytachu so časćišo z třělwami z distancy. A tak móžachu tež w 20. min. wurunać. Krzysztof Frydlewicz smokny bul z něhdźe 40 metrow do lěweho kuta. To běchu wrota měsaca. Po tym wotměwaše so hra zaso zwjetša mjez šěsnatkomaj. Wulke šansy pak sej wobaj cyłkaj wuhrać njemóžeštaj. Domjacy spytachu z kompaktnym wustupowanjom přećiwnika pod ćišć stajić. Tu drje falowaše zwjetša dokładnosć pola flankow abo přihrawkow, ale taktika so wudani. Maksimilian Zahrodnik staji hóstneho wrotarja pod ćišć, kiž jeho natřěli, a tak so bul wróćo do saka kuli. Chróšćenjo tuž znowa z kurioznym wrotami nawjedowachu.

Po přestawce Fortuna ćišć na domjacych zesylni, woprawdźite šansy pak so přihladowarjam njeskićachu. Najwjetšu za Chróšćanow měješe Filip Henzl. Jeho kop pak zamó wrotar z paradu wotwobarać. Tež na tamnej stronje je Petr Králíček dalšim wrotam z wurjadnym refleksom zadźěwał. Poprawom měješe hosćićel wšitko pod kontrolu a njedowoli přećiwnikej žane wulke šansy. W napjatych poslednich 15 mjeńšinach pak bě wšitko hinak. Po róžku falowaše porjad pola domjacych, a Sandro Jackob wuruna (77.). Bě pak pytnyć, zo njejstej wobě mustwje z dypkom spokojom. Tak měješe Pavel Runt po rjanej kombinaciji 3:2 na noze, ale misny wrota. Na tamnej stronje bu hrajer foulowany, a sudnik rozsudźi na jědnatku, kotruž zamó Artur Spraski k 2:3 přetworić. Krótko po tym sudnik hru wothwizda. Tak stejachu Chróšćenjo znowa bjez dypka na hrajnišću. Maksimilian Zahrodnik

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND