Šunowčan Stefan Möller je nětko hižo dwě lěće jako sportowy wučer a trenar w Choćebuskim olympiskim centrumje přistajeny. Tam wšak njejsu sportowcy dołhi čas prawidłownje trenować móhli. Tójšto z nich by so lětsa tež na olympiskich hrach wobdźěliło, njebychu-li wupadnyli. Nětko pak treningowe jednotki nimale zaso normalnje přewjeduja. Wo tučasnym stawje a wo planach za přichod je so Tadej Cyž-Njebjelčanski ze Šunowčanom rozmołwjał.
Witaj, Stefano. Sy runje z kolesom po puću był. Zwotkel jědźeš a što je noweho w Choćebuzu?
S. Möller: Přijědu runje z Choćebuza. Hdyž mój dźěłowy plan dowola a wjedro přešpatne njeje, jědu hdys a hdys z kolesom domoj do Šunowa. Po tym zo smy dołhi čas jenož indiwiduelnje trenowali a kóždy sam za sebje, je nětko normalny trening z wotpowědnymi naprawami zaso móžny.
Kajki bě fitnesowy staw twojich sportowcow, jako su so zaso na olympiske zepěranišćo wróćili?