Tokio (kh/SN). Njedźelu su w Tokiju 32. olympiske lětnje hry oficialnje zakónčili. Starodawne, tež lětsa płaćiwe zwěsćenje je, zo njemóžeš olympiske hry mjez sobu přirunać. Wšako su wšitke na swoje wašnje jónkrótne. A lětuše běchu wězo cyle wosebite. Tak dyrbjachu je koronapandemije dla přestorčić. Tež runoprawnosć hraješe tajku wulku rólu kaž hišće ženje. Druhdy pak nasta zaćišć, zo bě politika wokoło sportowcow a trenarjow wažniša a w medijach časćišo zastupjena hač žro olympiskich hrow, mjenujcy sportowe wurisanja.