Štóž so hiba, tón strowy wostanje. Prawidłowne sportowanje će před njeličomnymi chorosćemi a infekcijemi škita. Sport je kaž lěk a medicina. Trenowany sportowc skutkuje młódši a atraktiwny. Sportowanje zaruča wjele ludźom dźěłowe městno, a to nic jenož w fitnesowych centrumach. Wšitko trjechi! Hdźež pak je swětło, je tež sćin. Tule su štyri přikłady sportowcow, kotřiž mjenuja tohorunja rizika a strachi prawidłowneho sportowanja.
Na chribjet sportowcy njemysla, to je wulki problem
Bosćij Bjeńš (34) z Róžanta dźěła w Drježdźanach jako fyzioterapeut. Nimale wšědnje wón ludźom pomha, kotřiž maja ze swojimi myškami, kolenami abo z chribjetom někajke ćeže. „Runje amaterski sportowc často přelochkomyslnje trenuje. Mysli jenož na wokomik, lědma pak na woćoplenje, naćahowanje abo regeneraciju.“ Přiwšěm Bosćij Bjeńš kóždemu radźi, so telko kaž móžno hibać a sportować. We wšědnym žiwjenju dźě so dźeń a mjenje ćělnje napinamy.