Hdyž chceš turněr dobyć, trjebaš tež raz zbožo

srjeda, 30. nowembera 2022
artikl hódnoćić
(0 )
Skupinsku fazu je Nižozemska bjez wulkeho kuzłanja přećiwo domródnemu mustwu Katarej přetrała a steji we wosmifinalu.  Foto: pa/Koen van Weel Skupinsku fazu je Nižozemska bjez wulkeho kuzłanja přećiwo domródnemu mustwu Katarej přetrała a steji we wosmifinalu. Foto: pa/Koen van Weel

Po skupinskej fazy hodźi so rjec, zo měješe Nižozemska wulke zbožo ze skupinu A. Z dobyćom 2:0 přećiwo hosćićelej z Katara su woni mjenujcy suwerenje wosmifinale docpěli. Cody Gakpo (26.) a Frenkie de Jong (49.) běštaj trjechiłoj. Bě to triumf bjez błyšća a tola dospołnje zasłuženy. Přećiwo drje so prócowacemu, ale naposledk słabemu přećiwnikej wudoby sej Oranje skupinske dobyće. W tamnej skupinje dotalny wukon Nižozemjanow za prěnje městno dosahał njeby. W k.o.-hrach dyrbi so mustwo jasnje stopnjować, zo by hišće daloko přišło. We wosmifinalu steji tež Senegal. Afričenjo přewinychu předchadźaceho načolnika tabulki Ekuador z 2:1 a zawěsćichu sej tak druhe městno w skupinje A zady Nižozemskeje. Ismail Sar bě Senegal z jědnatku do wjedźenja třělił (44.). W mjezyčasu wuruna Moises Caicedo (68.), tola dwě mjeńšinje pozdźišo so Kali Koulibaly zaso wo stary wotstawk postara. Nětko čaka na nich dobyćer skupiny B, a to ­su Jendźelčenjo. Sobufaworit Jendźelska je swoje ambicije na titul podšmórnył a z dobyćom w britiskim duelu suwe­renje wosmifinale docpěł.

wozjewjene w: Sport
Prošu přizjewće so, chceće-li komentar podać

Serbska debata

nowostki LND