Film Grit Lemke hosći w zastupnistwje Sakskeje w Berlinje jimał
Berlin (SN/MiP). Nimale 150 zajimcow w połnje wobsadźenej žurli krajneho zastupnistwa Sakskeje w Berlinje witaše wčera społnomócnjeny Sakskeje pola Zwjazka Markus Franke na předstajenje filma režiserki Grit Lemke „Pola nas rěka wona Hanka“. Jemu poboku postrowi publikum Madlena Malinkowa, społnomócnjena za serbske naležnosće w sakskim ministerstwje za wědomosć, kulturu a turizm, a to serbsce. Wobaj wuzběhnyštaj fakt, zo je serbska kultura a rěč wažny wobstatk sakskeje identity – zo „samozrozumliwje k Sakskej słušatej“. Madlena Malinkowa skedźbni na to, zo tematizuje film Grit Lemke aktualne a zdobom dawno eksistowace prašenja za Serbow, kaž na přikład: Što poprawom je serbska identita? Što činimy, hdyž rěč a identitu zhubimy? „UNESCO liči dźensa wobě serbskej rěči k wohroženym rěčam na swěće“, praji wona.
