Šulerjo 8. a 9. lětnika Serbskeje wyšeje šule „Michał Hórnik“ we Worklecach maja tuchwilu, krótko do lěćnych prózdnin, dwaj tydźenjej šulerski praktikum. Po prěnim tydźenju je so Luiza Mikławškec někotre šulerki za jich zaćišćemi prašała.

Alena Ričlec: Swój praktikum přewjeduju w Hórkach w jěchanskej terapiji Ellen Smolineje. Sym so za tole rozsudźiła, dokelž tam we wólnym času rady jěcham. Prěni tydźeń bě napinacy, ale je so mi přiwšěm jara lubił. Dźěłam wosom hodźinow wob dźeń. Njejsym jenička praktikantka, kotraž tam dźěła. Nětko, w druhim tydźenju swojeho praktikuma na statoku, bych rady dźěći na konju wuwučować chcyła. Jako wučerka za jěchanje pak so njewidźu. Powołansce bych so radšo ze skótnej lěkarku stała.