Wo móžnosći, zo so Serbski seminar klětu ze serbskich rukow zhubi abo zo jón Sakska kupi, smy předwčerawšim informowali. Lukáš Novosad je so naprašował, kajku rólu tutón dom za serbsko-čěske poćahi a serbsku towaršnosć hraje.
Eliška Oberhelová, městopředsydka Towarstwa přećelow Serbow (SPL): Skutkowanje towarstwa bjez seminara njemóžu sej derje předstajić. Njeńdźe jenož wo to, hosći w rjanym domje witać móc – wón je symbol splećenja Serbow a Čechow. Je to městnosć, hdźež so zetkawaja a hdźež so serbske stawizny předstajeja. Bjez seminara zhubi towarstwo wulki dźěl zmysła swojeje eksistency.
Radek Čermák, bywši předsyda SPL: Jako je po wulkej wodźe w lěće 2002 čěske šulske ministerstwo SPL z doma wuhnało a jemu zakazało, dale tam skutkować, dyrbjachmy hinak fungować. To njebě jenož njezbožo – zeznali smy wjele nowych ludźi, kiž su za naše zarjadowanja do druhich institucijow abo do korčmow chodźili. Nadobo bě lóšo, zajim ludźi za Serbow budźić. Běchmy kaž zajězdowe dźiwadło, ale wobstatki towarstwa su tehdom w pincach hnili.





