Zo bychu so lěpje do dźěłowych wikow integrowali, spěchuje agentura za dźěło we wuchodnej Sakskej 960 wobdźělnikow rěčnych kursow. Nimo toho chce wona młodych wukrajnikow na wukubłanje přihotować. Hospodarstwo to podpěruje.
Budyšin (CK/SN). Lětsa šef Budyskeje agentury za dźěło Thomas Berndt wočakuje, zo ličba dźěłowych městnow z winowatostnym socialnym zawěsćenjom w Hornjej Łužicy wo procent přiběra. Při tuchwilu 191 575 městnach je to nahladna ličba. Najebać jednocyfrowu bjezdźěłnostnu kwotu cyłe minjene lěto a aktualnje „jara robustne“ dźěłowe wiki Thomas Berndt z toho wuchadźa, zo bjezdźěłnosć přiběra. Ćěkancow dla liči Zwjazkowa agentura za dźěło po wšej Němskej ze 70 000 přidatnymi bjezdźěłnymi. Kelko jich w Hornjej Łužicy budźe, hišće rjec njemóža. Ze zwjazkoweje prognozy njehodźa so ličby za regiony wotwodźeć. To ma přičinu w tym, zo smědźa so migranća po zwěsćenju swojeho statusa z prawom přebywanja po cyłej Němskej hibać. Hižo nětko je spóznać, zo woni tule njewostanu, wulke centrumy wosebje na zapadźe Němskeje přejara wabja, šef agentury wuswětla.
