Budyšin (SN/BŠe). Sakske socialne ministerstwo je inwesticiski projekt bjezbarjerneho twarjenja pod hesłom „Najlubše městna za wšitkich“ znowa wupisało a namołwja zajimcow, so wo spěchowanske srědki požadać. Zaměr projekta je zbrašenym ludźom wolóžić přistup k zjawnym twarjenjam abo zarjadnišćam a wobstejace barjery wotstronić.

Za cyły swobodny stat planuje Sakska klětu 2,5 milionow eurow financnych srědkow. Za Budyski wokrjes je předwidźane 198 000 eurow inwestować. Dotal pak je so jenož mało ludźi přizjewiło. „Wjetšina z nich ma hišće swoje projekty planować a kalkulować“, zdźěli Budyski socialny zarjad. Spěchowanske próstwy měli tam zajimcy na zakładźe formulara zapodać. Předležeć měli wone nanajpozdźišo 13. januara, potajkim za dwaj tydźenjej.

Přiwšěm hodźi so hižo nětko rjec, zo zajim za spěchowanske srědki porno minjenym lětam přiběra. Přičina toho je wjac wabjenja a lěpše podawanje informacijow. Projekt, kotryž sakske socialne ministerstwo mjeztym štwórty raz přewjeduje, je wšak mjez ludźimi tež znaty.