Potencial elektrifikowaneje čary Choćebuz–Hórka–Zhorjelc přepytowali

Budyšin/Choćebuz (SN/at). Hłowne železniske čary po Łužicy njejsu w swojej dospołnej dołhosći abo njejsu scyła elektrifikowane. Ze směra Berlina kónči so jězbny grót w Choćebuzu. Kaž wotrězk Drježdźany–Zhorjelc přez Budyšin zwobraznja, njeje pobrachowaceje elektrifikacije dla móžno, zo tu mjezynarodne ćahi dale na wuchod jědu. Třeća hłowna čara z Rólan přez Wojerecy k pólskej hranicy budźe jako prěnja kompletnje elektrifikowana, hdyž budu dźěła mjez Hórnikecami a Hórku na tak mjenowanej Delnjošleskej magistrali wotzamknjene.

Mjenowaneho njespokojaceho stawa dla je Choćebuska Industrijna a wikowanska komora (IHK) potencial elektrifikowanja železniskeje čary Choćebuz–Hórka–Zhorjelc we wědomostnym posudku pruwować dała. Wuslědki wu­je­wjeja, zo hodźało so štyri króć telko tworow wozyć. Tež wosobowy wobchad by z toho lěpšinu měł, zdźěla Choćebuska IHK.