Klewerniše mustwo hru rozsudźiło

póndźela, 02. septembera 2019
artikl hódnoćić
(0 )
Handrij Korjeńk (srjedźa, Njebjelčicy), tu w hrě přećiwo rezerwje z Ćiska, bě w serbskim koparskim derbyju mjez SJ Njebjelčicy a SJ Chrósćicy II z trojimi wrota mi jedyn z garantow za dobyće hosćićela.  Foto: Jörg Stephan Handrij Korjeńk (srjedźa, Njebjelčicy), tu w hrě přećiwo rezerwje z Ćiska, bě w serbskim koparskim derbyju mjez SJ Njebjelčicy a SJ Chrósćicy II z trojimi wrota mi jedyn z garantow za dobyće hosćićela. Foto: Jörg Stephan

Tabulka wokrjesneje ligi, stafle 2

1. HZ Lubuš/Bluń 4 13 : 3 10

2. ST Hlinowc 4 18 : 8 9

3. HZ Łaz/Běły Chołmc 4 13 : 6 9

4. FSV Łuty 4 15 : 10 9

5. ST Radwor 4 9 : 4 8

6. Traktor Malešecy 4 15 : 9 7

7. 1896 Wulka Dubrawa 4 11 : 8 7

8. HZ Wojerowski FC II 3 10 : 7 6

9. SJ Chrósćicy II 4 9 : 13 6

10. HZ Hórnikečanski jězor 3 8 : 6 4

11. SV Haselbachtal 4 10 : 15 4

12. SZ Wóslink/Skaskow 4 7 : 12 4

13. SJ Njebjelčicy 4 4 : 6 3

14. Módro-běli Minakał 4 8 : 13 1

15. HZ Rakecy II / Šćeńca 4 5 : 22 1

16. ST Nadrózna Hrabowka 4 4 : 17 0


SJ Njebjelčicy

– SJ Chrósćicy II 3:0 (1:0)

Zestawa domjacych: Hahn – D. Kral, Hanuza, Gödig, O. Domš, Pawlik (46. Wagner), Čornak (30. Hoelzel), Šołta (86. Hrjehor), Plaettner, Haška, Korjeńk

Zestawa hosći: Klimant – M. Donat, Wowčer, K. Mark, L. Zahrodnik, Mohaupt (52. Liznar), G. Zahrodnik (70. Handrik), Šiman, Zynda, J. Donat (82. Cyž), Matješk

Za koparjow Njebjelčanskeje SJ bě to dweju přičin dla chětro wažna partija hišće­ młodeje hrajneje doby. Na jednej stro­nje steješe serbski koparski derby přećiwo Chróšćanskemu druhemu mustwu na planje. Tajki bě w zašłymaj se­zonomaj stajnje snadnje wušoł. Na tamnej stronje hladachu přiwisnicy, hrajerjo kaž tež zamołwići do hry na prózdne dypkowe konto. Trenar Handrij Krawčik žadaše sej tuž wot swojeho cyłka wose­bity angažement.

Prěnje mjeńšiny partije pak słušachu hosćom z Chrósćic. Ze solidneje de­fensiwy suwachu sej woni w centrumje wokoło Gabriela Zahrodnika a Samuela Šima­na bul tam a sem a posłužowachu spěšnych hrajerjow na křidłomaj. Domjacy bul w natwarje přespěšnje wo­tedachu. Tak wuskočichu šansy před wrotami w prěnjej štwórćinje hry jeno za Chróšćanow. Flanka Józefa Donata z lěweje strony dźěše na zbožo hosćićela snadnje wyše wrotow. W dalšej situaciji zwrěšći Donat na sylnym Nicu Hahnje we wrotach.

W 24. min. Hahn hru spěšnje přez lěwe­­ křidło wotewri. Franz Gödig so na won­kownej čarje přesadźi a posłuži Handrija Korjeńka do běha. A tón suny kulowatu kožu nimo wrotarja k 1:0 do saka. Hrajerjo z Chrósćic mějachu naje­bać to dale wulki hrajny podźěl, ale před wrotami so hižo dosć strašnje njejewjachu.

We 48. min. so Korjeńk druhi raz ze swojej spěšnosću přesadźi a bul nimo wrotarja Bosćija Klimanta k 2:0 (48.) do kuta zaměstni. Nětko so chowancy Krawčika defensiwnišo wusměrichu, skićejo Chróšćanam mjenje rumow w swójskej połojcy. Ći drje přez wobě křidle do šěsnatki tłóčachu, ale defensiwa hosćićela so połnje koncentrowaše. W 70. min. skićeše so Njebjelčanam přez lěwe kři­dło konter. Gödig so zboka do šěsnatki předrě a w dwuboju padny. Sudnik nablaku na jědnatku rozsudźi. Wrotar Klimant pak je prawy kut čuł a zamó jědnatku wotwobarać. Tak da rozsud hač do 79. min. na so čakać. To je Korjeńk w dwu­boju z wrotarjom bul w syći zaměstnił a tak dobyće Njebjelčanow zawěsćił. Chróšćenjo prezentowachu so w hrě jako agilne a spěšnje kombinowace mustwo. Tón dźeń pak falowaše po zdaću jenož klewernosć před wrotami. SJN porno tomu bě z poslednim mužom w defensiwje za waž­nu hru dobry srědk k dobyću namakała. Jurij Haška

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND