Dale bjez poražkipřiwšěm přesłapjeni

wutora, 03. septembera 2019
artikl hódnoćić
(0 )
Stephan Reineke (nalěwo, Radwor) je Radworskemu cyłkej njedźelu wosebje jako třělc wrotow pobrachował. Zhromadnje z Tomom  Schulzu wuprudźa wón před wrotami přećiwnika wulku strašnosć. Foto: Jörg Stephan Stephan Reineke (nalěwo, Radwor) je Radworskemu cyłkej njedźelu wosebje jako třělc wrotow pobrachował. Zhromadnje z Tomom Schulzu wuprudźa wón před wrotami přećiwnika wulku strašnosć. Foto: Jörg Stephan

ST 1922 Radwor – HZ Lubuš/Bluń 1:1 (1:1)

Zestawa domjacych: Grenzemann – Wjeńka, Bauer, Kral, Zähr, Wjacławk, Paška­ (65. Nuk), Pěčak (72. Robel), Šěrak, Mark (81. Jendrewski), Schulze

Na štwórtym hrajnym dnju wokrjesneje ligi, stafle dwaj witachu koparjo ST Radworja Hrajne zjednoćenstwo Lubuš/Bluń. Hosćo běchu do partije jeničke mustwo z wokrjesneje ligi, kotrež bě wšitke dotalne dobyło. Zo njebudźe to jednora hra, bě potajkim wšěm wědome. Sylneho zliwka dla zahwizda sudnik hru 20 mjeńšin pozdźišo. Wjele přiwisnikow wobeju cyłkow bě do Radworja přijěło a postara so wo rjanu kulisu.

Prěnje poł hodźiny słušeše jasnje hosćom. Radworčenjo so w tym času jenož jónu strašnje před jich wrotami zjewichu, jako Matej Wjeńka w 6. min. škitarja wuhra a steješe sam před wrotarjom, kiž přećiwnika před zažnym zastatkom zachowa. Hóstne mustwo měješe prěnju móžnosć we 8. min. Po dołhej třělwje přez Radworski škitny rjećaz misny nadběhowar Lubuša/Blunja wrota wo někotre centimetry. Domjacy cyłk agěrowaše w naslědnej fazy přepasiwnje. Wotstawki běchu stajnje přewulke a koparjo běchu stajnje krok přepomali. W 26. min. so to wjećeše. Radworski škitar zhłójčkowa bul před šěsnatku do centrale, zwotkelž přetwori přećiwniski nadběhowar z niskej třělwu k 0:1. Wrotar Peter Grenzemann njeměješe žanu šansu. W 33. min. dalša dobra móžnosć za hosći: Po dołhim róžku­ steješe nadběhowar chětro sam a zhłójčkowa bul na wrota, hdźež Jo­hannes Wjacławk na wrotowej liniji bul na łatu wotwobara. Radworski trenar Andreas­ Schultze spyta z taktiskej změnu wjac kontrole nad hru dóstać, štož so tež poradźi. We 38. min. postara so kapitan Tom Schulze po přihrawce Johannesa Zähra wo wurunanje, jako z něhdźe 25 metrow z krasnej třělwu wuruna. Z mjezystawom 1:1 rozžohnowaštej so mustwje do přestawki.

W druhim połčasu běchu Radworčenjo sylniše mustwo. Schulze wubědźi sej w 49. min. po róžku bul a spyta wospjet zaso swoje zbožo, tónkróć z něhdźe 30 metrow. Wrotar hosći parěrowaše pak bul z wulkotnym refleksom. W 69. min. pokaza sudnik hrajerjej hosći žołtu-čerwjenu kartu, a dwě mjeńšinje pozdźišo móžachu hosćo Radworski škit z dołhej třělwu přewinyć. Wrotar Grenzemann přichwata z klětki, zo by bul wotpopadnył. Nadběhowar spyta jeho wuhrać, zrazy pak do Grenzemanna. Sudnik rozsudźi na wólny kop zwonka šěsnatki a na žołtu kartu za Grenzemanna. Wólny kop pak ničo njewunjese. Hačrunjež běchu domjacy wot 69. min. jedyn kopar a wot 84. min. samo dwaj wjac (dalša amplowa karta), so jim njeporadźi sej dobyće wunuzować.

Přichodny kónc tydźenja jědu Radworčenjo na pokalnu hru do Małeho Wosyka (Kleinhänchen). Dalšu dypkowu hru změja potom tydźeń pozdźišo, a to budźe derby we Wulkej Dubrawje. Daniel Nuk

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND