W nazymskich prózdninach podachu so Worklečanscy wolejbulisća do treningoweho lěhwa w sportowym centrumje Rabenberg. Wot pjatka do njedźele stejachu tam taktiske lekcije pod nawodom Stephana Wjeńki, hry kaž tež zwučowanja mocy a wutrajnosće po instrukciji Clemensa Eckerta na programje.
Wolejbulisća prěnjeho a druheho mustwa Viktorije Worklecy běchu chutnje při wěcy. Hrajerjo wokoło kapitana Ludwiga Eckerta přihotowachu so tak na wažne partije sezony. Tež zhromadnosć a zabawa přinošowaštej k dobrej atmosferje mjez wobdźělnikami treningoweho lěhwa. Na wróćopuću z Rudnych horin zdobychu sej Worklečenjo na wotpočnišću nowych přiwisnikow. Tři wuměnkarki (hlej foto) jim wotnětka palcy tłóča, hdyž zaso wo dypki dźe.