Naćisk kultusoweho ministerstwa wuwabja wjele prašenjow
Budyšin (SN/BŠe). Sakske kultusowe ministerstwo je w měrcu dźěłowy naćisk k syći powołanskich šulow předpołožiło. „Přihotujemy powołanske šule na přichod a zawěsćamy planowansku wěstotu hač do lěta 2020. Kóždolětne přiměrjenje wukubłanskich poskitkow měło zašłosći přisłušeć“, wujasni sakski kultusowy minister Christian Piwarz. Hdyž pak so z naćiskom bliže zaběraš, wujewjeja so mnohe prašenja, kotrež tež Budyske stejnišćo potrjechja, a to wosebje pjekarski wobłuk. „Najwjetša překwapjenka bě, zo maja so pjekarjo přichodnje w Zhorjelcu wukubłać“, wuswětli jednaćelka Budyskeho wokrjesneho rjemjeslnistwa Sabine Gotscha-Schock na naprašowanje. Budyske stejnišćo wšak ma ze swójskej kuchnju a modernymi kachlemi najlěpše wuměnjenja, kajkež w Zhorjelcu nimaja. Tam pjekarjow tuchwilu ani njewukubłuja. „Problemy su nam znate a dźěłamy na tym“, jednaćelka wobkrući. Hišće njeje ničo njerozsudźene, wšako jedna so wo dźěłowy naćisk. Kelko pak so na tym změnić hodźi, njeje wěste.