Pola Niskeje ma testowy centrum za železnisku techniku nastać
Niska (AK/SN). Sewjernje Niskeje ma na 20 kilometrow dołhim wobkruhu „Testowy centrum za železnisku techniku Sakskeje“ (TETIS) nastać a po móžnosći w lěće 2025 dźěłać započeć. Projekt płaći po prěnich trochowanjach něhdźe 270 milionow eurow, kotrež chcedźa ze srědkami strukturneje změny, Swobodneho stata Sakskeje a dalšich pjenjezydawarjow financować. 150 nowych krutych dźěłowych městnow chcedźa tam wutworić. „Testowy centrum budźe mjezynarodny. Štóž skruća europske stejnišćo, skruća sakske“, podšmórny sakski minister za hospodarstwo, dźěło a wobchad Martin Dulig (SPD) wčera w Niskej. Tam stej Łužiska dźěłarnja přichoda a TÜV Süd Rail tzwr studiju wo potencialu stejnišća předstajiłoj. Heiko Jahn, jednaćel towaršnosće Łužiski hospodarski region jako nošerki Łužiskeje dźěłarnje přichoda, je studiju ministrej přepodał.
