Žně kórkow z trochu zapozdźenjom zahajene

srjeda, 24. junija 2020
artikl hódnoćić
(0 )
Wot minjeneho tydźenja su zaso žnjowe mašiny za kórki, tež znate jako kórkowe lětadła, na błótowskich zahonach po puću.  Foto: Melanie Kossatz Wot minjeneho tydźenja su zaso žnjowe mašiny za kórki, tež znate jako kórkowe lětadła, na błótowskich zahonach po puću. Foto: Melanie Kossatz

Lubin (SN/JaW). Něhdźe tydźeń pozdźišo hač hewak su lětsa w Błótach započeli kórki žnjeć. To zdźěli našemu wječornikej jednaćelka Błótowskeho towarstwa Melanie Kossatz. „Tónraz su žně najznaćišich kórkow swěta koronakrizy wosebite wužadanje. Přiwšěm su je ratarjo na něhdźe 500 hektarach plahowali, štož wotpowěduje niwowej minjeneho lěta.“

Plahowarjo kórkow liča lětsa z wunoškom cyłkownje něhdźe 30 000 tonow, byrnjež połoženje hižo njewšědne było. Ćeže mějachu z lodowymi mužemi, kotrež postarachu so wosrjedź meje hišće raz wo te abo tamne škody. Wšako naměrichu 12. meje minus šěsć stopnjow celsija. „Zdźěla su samo rostliny znowa sadźeć dyrbjeli. Hinak hač loni pak wosta wjedro hač dosrjedź junija dosć miłe, štož róst kórkow spomali. Lokalne zliwki přinošowachu k rozdźělnemu wuwiću sadźenkow, ale tež škódniki kaž pomjedź so na wunošk wuskutkuja“, Melanie Kossatz wuswětla.

wozjewjene w: Hospodarstwo
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND