Poskitki za skupiny lětsa nimaja

srjeda, 02. septembera 2020
artikl hódnoćić
(0 )
Dožiwjenski swět Lavaris je najnowša atrakcija Małowjelkowskeho prazwěrjenca. Samo wulkan so tam sčasami kuri.  Foto: Uwe Menschner Dožiwjenski swět Lavaris je najnowša atrakcija Małowjelkowskeho prazwěrjenca. Samo wulkan so tam sčasami kuri. Foto: Uwe Menschner

Aktualneho połoženja koronapandemije dla dyrbja tež w Małowjelkowskim prazwěrjencu tuchwilu wobmjezowanja wobkedźbować. Wopytowarjo pak móža přiwšěm wjele wjesela měć, hdyž někotre prawidła dodźerža.

Mały Wjelkow (UM/SN). „Wólnočasny park dyrbi so zas a zaso wunamakać, zo bychu wopytowarjo znowa přijěli“, wě Diana Liebsch. Wona je we wobdźělenskej a wobhospodarjenskej towaršnosći (BBB), kotraž Małowjelkowski prazwěrjenc wobhospodarja, za zjawnostne dźěło zamołwita. Poslednje „nowowunamakanje“ je loni přepodaty dožiwjenski swět Lavaris, dopominacy na čas, jako ani hišće sawriery na zemi njeběchu. Přichodne nowosće pak hižo planuja. „Chcemy třěchu zakuskoweho předawanišća ponowić a sanitarne připrawy saněrować. Wudospołnjenja su tež we wobłuku zabyteho swěta předwidźane.

Wšitko pak planować njemóžeš, kaž dyrbjachu lětsa nazhonić. Tak njemóžachu po zwučenym wašnju 1. apryla wočinić, ale hakle 20. meje. Wot toho časa dźěłaja w koronamodusu. To woznamjenja, zo móžeš park jenož wopytać, hdyž sy sej lisćik online kupił. „Naš hygienowy koncept předwidźi maksimalnje 2 500 wopytowarjow wob dźeń. W prěnich tydźenjach po wotewrjenju mějachmy tež dny, hdźež dyrbjachmy zajimcow wot­pokazać“, Diana Liebsch wobžaruje. Zo bychu tomu zadźěwali, zawjedźechu na termin wjazane lisćiki, z kotrymiž móžeš cyły dźeń w parku być. Předawanišćo su­weněrow wostanje dopołdnja zawrjene, po pućikach wutworichu wodźenski system, a kuple na planetowym hrajka­nišću móžeš nětko jenož wotwonka wobdźiwać. Poskitki za skupiny lětsa ­scyła nimaja.

Wot lětušeho słuša tež susodne błudźišćo k prazwěrjencej. Zastup do njeho pak je hišće separatny a ze swójskim lisćikom. „Perspektiwisce chcemy błudźišćo jako dźěl parka integrować, za to pak su twarske změny trěbne“, Diana Liebsch wuswětla. Woblubowanu powjaznicu pak dyrbjachu wottwarić, dokelž bychu so hewak cyły dźeń wo nju starać dyrbjeli, štož personelnje móžno njeje.

Při wšěch wobmjezowanjach bě najznaćiše wólnočasne zarjadnišćo Budyskeho regiona w ćežkich časach solidarne z tymi, kotřiž su so hišće ćešo měli. „Smy zwěrjencam našeho regiona pjenjezy za picu darili. Naše prazwěrjata dźě na zbožo ničo nježeru“, Diana Liebsch z posměwkom praji. A chutnje dodawa: „Wšako hižo wjele lět zhromadne akcije přewjedujemy.“

wozjewjene w: Hospodarstwo
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND