Na Kamjenskim lětanišću maja truty awtonomnje lětać móc

Kamjenc (BG/SN). Strukturna změna we Łužicy je so zahajiła. A naraz ma sto lět stare Kamjenske lětanišćo zaso přichod. Přichodnje ma so tam projekt zwoprawdźić, kajkiž njemóhł sej do wčerawšeho lědma štó předstajić. Lětanje bjez pilotow, kerozina abo bencina je so zahajiło a w Kamjencu nastanje kompetencny centrum za awtonomne a elektriske lětanje. Přemysłowe truty ze zamóžnosću enormne zdalenosće přewinyć budu bórze nad Kamjencom lećeć. Pozdźišo měli tež lětanske taksije k tomu přińć. „Lětanske město Kamjenc skići za to najlěpše wuměnjenja“, zwurazni prof. dr. Hubertus Domschke z Braniborskeje techniskeje uniwersity Choćebuz-Zły Komorow. Nimo toho dźe wo slědźenje we Łužicy. Tak ma w Kamjencu realny labor nastać, hdźež budu pod zakonskimi wuwzaćemi eksperimentowanske pola za nowe wašnje lětanja přihotować. Na wčerawšej ­nowinskej rozmołwje k załoženju kompetencneho centruma za awtonomne a elektriske lětanje je so prawdźepo­dobnje start do noweje doby zahajił.