Biskopicy (SN/at). Njewupada tak, kaž bychu hornjołužiske srjedźostawske předewzaća změnu strukturow po kóncu zmilinjenja brunicy nastupajo zboka stali. To bě jasne poselstwo Jensa Frühaufa, zastupjerja wokrjesneho wuwićoweho zarjada w Budyskim krajnoradnym zarjedźe, na wčerawšim 21. srjedźostawskim dnju Zwjazkoweho zjednoćenstwa srjedźostawskeho hospodarstwa (BVMW) na Butrowej horje w Biskopicach. Do zarjadowanja wozjewjenu kritiku tudyšeje lobbyjoweje organizacije nastupajo wón znapřećiwi, zo njeje direktne spěchowanje předewzaćow po artiklu 104 Zakładneho zakonja kaž tež po Europskej směrnicy wo připomocach scyła móžne. Firmy pak změja wunošk ze strukturneje změny, dokelž maja wone při­zwolene projekty sobu zeskutkownjeć. Nimo toho skedźbni Frühauf na fonds Europskeje unije z mjenom Just-transition-fund. Z toho hornca, kotryž je strukturneho razu, dóstawaja wot energijoweho přewróta wosebje potrjechene regiony wot EU přidatnu podpěru za sprawny přechod.