Budyšin (SN/CS). Hosćo „Budyskeje narěče“ dožiwichu pjatk w Budyskej Pětrowej cyrkwi premjeru: Prěni króć njewuhotowaše wječor jedyn rěčnik abo rěčnica, ale běštaj to dwaj: bratraj Stefan a Aleksander Jakschik, kotrajž zhromadnje předewzaće nawjedujetaj. 2015 běštaj je wot swojeho nana dr. Christiana Jakschika přewzałoj. Firma ULT AG bu 1994 w Lubiju załožena, w njej dźěła dźensa 200 sobudźěłaćerjow, kotřiž nadźěłaja lětnje wobrot 30 milionow eurow. W Lubijskim zawodźe techniku za filtrowanje zhotowjeja, z kotrejež pomocu hodźi so kwalita powětra polěpšować. „Naše dźěło škita ludźi a produkciske procesy“, tak pře­dewzaćelej swoje dźěło wopisujetaj. W přednošku, kotryž dźeržeštaj w formje dialoga, pytaštaj Budyšanaj za wotmołwu na prašenje, što naše derjeměće wobwliwuje a kak hodźi so na změny socialneho wičneho hospodarstwa reagować. Srjedźny staw, wosebje mašinotwar, je wažny stołp derjeměća. „Bjez tworjenja hódnotow nimamy ničo, štož móhli rozdźěleć“, rjekny Aleksander Jakschik.