Na dnju wotewrjenych twarnišćow kónc junija bě tež twarnišćo Smart Mobility Lab (SML) w Čornym Chołmcu přistupne. Tam dóstachu wopytowarjo prěni raz wobšěrny dohlad do po wšej Europje jónkrótneho slědźenišća za splećenu a awtonomnu mobilitu.

Čorny Chołmc. „Wow, gigantiske“, tak reagowachu wopytowarjo na dnju wotewrjeneho twarnišća Smart Mobility Lab (SML) Drježdźanskeje Techniskeje uniwersity (TU) w Čornym Chołmcu. 43 metrow wysoke ma nowe slědźenišćo a inowaciske zarjadnišćo być. Tam chcedźa fachowcy wot klětušeho awtomatizowany nadróžny wobchad kaž tež lětarstwo a ratarstwo přichoda wupruwować, jedyn ze zamołwitych za twar, Jost Wunderlich z Drježdźanskeje uniwersity, rozkładźe.