Den Haag (dpa/SN). Hłowny wobskóržbnik Mjezynarodneho chłostanskeho sudnistwa je sej wukazy zajeća přećiwo israelskemu ministerskemu prezidentej Benjaminej Netanjahuwej a nawodźe teroristiskeje organizacije Hamas w Gazaskim pasmje, Jihia al-Sinwarej žadał. Tole je sudnistwo wčera w Den Haagu zdźěliło.
Hłowny wobskóržbnik Karim Khan w zwisku z wójnu w Gazaskim pasmje złóstnistwa přećiwo čłowjeskosći přepytuje. Dalše wukazy zajeća měli sudnicy přećiwo israelskemu zakitowanskemu ministrej Joavej Galantej, naměstnikej nawody Hamas Mohammedej Deifej a šefej Hamas we wukraju Ismailej Hanijej wukazać. Nawodnikam Hamas wumjetuje sudnistwo morjenje, zawlečenja zastajencow, wumocowanje a krjudowanja. Ministerskemu prezidentej Netanjahuwej wumjetuja wuhłódnjenje ciwilistow, swojowólne morjenja přez wojakow a zaměrne nadpady na ciwilistow.
Kijew (dpa/SN). Wonkowna ministerka Annalena Baerbock žada sej hladajo na rusku ofensiwu w Ukrainje wjace mjezynarodneje podpěry za Ukrainu na dobro zakitowanja powětroweho ruma. „Zo bychmy Ukrainu před nawalom ruskich raketow a trutow škitali, trjeba wona lěpši powětrowy škit“, žadaše sej politikarka Zelenych dźensa k zahajenju swojeho mjeztym sedmeho solidaritneho wopyta w Ukrainje po spočatku ruskeho nadpada w februaru 2022. Wonkowna ministerka bě dźensa rano z ćahom dojěła. Wopyt ministerki njeběchu z wěstotnych přičin do toho připowědźili.
„Dyrbimy nětko wšitke mocy zwjazać, zo móhła Ukraina wobstać a zo njebychu wojerske jednotki Putina bórze před našimi mjezami stali“, apelowaše Baerbock hladajo na ruskeho prezidenta Wladimira Putina a na mjezynarodne partnerske kraje. Baerbock a zakitowanski minister Boris Pistorius (SPD) staj iniciatiwu na dobro ukrainskich powětrowych zakitowanskich mocow nastorčiłoj a mjeztym miliardu eurow nazběrałoj.
Wostudźeni technikarjo koncertoweho zarjadowarja su w Erfurće zasadźenje policije zawinowali. Po krótkodobnym wotprajenju koncerta spěwarja Marka Forstera w durinskej krajnej stolicy běchu sobudźěłaćerjo njewočakowany wólny čas wužili a hrajachu w hoberskej hali kopańcu. Stražnicy firmy za wěstotu mějachu jich za paduchow a zawołachu policiju. Zastojnicy naležnosć wujasnichu a přewodźachu technikarjow z domu.
Před ćeknjenym bykom warnuje policija wobydlerjow w rudnohórskim Oberwiesenthalu. Něhdźe 600 kilogramow ćežke běło-žołte zwěrjo je prawdźepodobnje ćeknyło a chowa so w lěsach na kromje Hammerunterwiesenthala. Štóž byka wuhlada, měł policiju spěšnje informować. Wuraznje zamołwići před tym warnuja, so zwěrjeću bližić abo jeho snano popadnyć chcyć.
Berlin (dpa/SN). Zwjazkowa rada je dźensa změnje prawa mjenow přihłosowała. Wot zwjazkoweho sejma w aprylu wobzamknjeny zakoń mjez druhim předwidźi, zo móžetaj wobaj mandźelskaj dwójne mjeno měć. Dotal bě to jenož za jednoho z nich móžno. Dźěći smědźa přichodnje tohorunja dwójne mjeno měć, tež potom, jelizo nimaja starši zhromadne mjeno. Serbja a Frizojo čakachu z wosebitym zajimom na rozsud zwjazkoweho sejma. W zakonju je cyłkownje pjeć nowosćow zakótwjenych, mjez druhim splahej přiměrjene swójbne mjeno.
Wočakuja mjenje dochodow
Drježdźany (dpa/SN). Swobodny stat dyrbi z jasnje mjenje dawkowymi dochodami wuńć hač wočakowane. Sakski statny etat móže hladajo na wuslědk trochowanja dawkow w meji lětsa z dochodami we wobjimje 19,1 miliardy eurow ličić, zdźěli dźensa sakske financne ministerstwo w Drježdźanach. Wuhlady w hospodarstwje su tuchwilu chětro špatne, zwěsći sakski financny minister Hartmut Vorjohann (CDU).
Zakładny zakoń hódnoćiła
Podstupim (dpa/SN). Braniborski ministerski prezident Dietmar Woidke (SPD) je so za to wuprajił, sylnišo z Pólskej hromadźe dźěłać. „Žiwe němsko-pólske přećelstwo přinošuje sylnej Europje“, wuzběhny wón wčera w Podstupimje. Woidke so wjeseli, zo je nowe knježerstwo we Waršawje wotewrjene a ma zajim z Němskej kooperować. Wuwiće hraničneho regiona dyrbjałoj knježerstwje w Berlinje a Waršawje zaso sylnišo forsěrować.
Dietmar Woidke je městopředsyda němsko-pólskeje přećelskeje skupiny. Předsyda je sakski ministerski prezident Michael Kretschmer (CDU). Čłonojo skupiny staraja so wo dobre ramikowe wuměnjenja zhromadneho dźěła. Sakska a Braniborska stej na swojim zhromadnym posedźenju kabineta w aprylu k tomu iniciatiwu zwjazkoweje rady wobzamknyłoj. Iniciatiwa ma so dźensa Zwjazkowej radźe zapodać. Mjeztym su so tež druhe zwjazkowe kraje – mjez nimi wšitke na wuchodźe Němskeje – přizamknyli.
Berlin (dpa/SN). Po tym zo je zwjazkowy sejm wčera dopołdnja zapósłancej AfD Petrej Bystronej imunitu zběhnył, je tež jeho frakciski kolega a předsyda Młodeje alternatiwy Hannes Gnauck potrjecheny. Parlament hłosowaše wčera wječor přećiwo hłosam AfD za wotpowědne doporučenje imunitneho wuběrka. Z tym předleži dowolnosć za přewjedźenje sudniskeho disciplinarneho jednanja.
Wo pozadkach k tomu njebě spočatnje ničo znate. Po informacijach ARD pak jedna so wo disciplinarny pad jako bě Gnauck hišće pola Zwjazkoweje wobory. Mjeztym zastupuje wón AfD w parlamentariskim zakitowanskim wuběrku. To su politikarjo druhich stron wótrje kritizowali, dokelž bu znate, zo bě wojerska słužba (MAD) Zwjazkoweje wobory bywšeho wojaka jako „ekstremista“ zastopnjowała.
Přećiwo Petrej Bystronej přepytuje Mnichowske statne rěčnistwo podhlada wobtykowanja dla. Mjeztym su sobudźěłaćerjo rěčnistwa jeho běrow a dalše objekty přepytowali.
Berlin (dpa/SN). Hladajo na trěbne předźěłanje splažneho znjewužiwanja w Berlinskim, Zhorjelskim a Drježdźansko-Mišnjanskim biskopstwje žada sej rada potrjechenych dale wyše tempo dźěła. Konkretnje žada sej zastupnistwo potrjechenych spěšne zahajenje socialno-wědomostneho přepytowanja, kotrež ma bjezposrědne a dołhodobne sćěhi znjewužiwanja wobswětlić. Koncept za studiju běchu hižo w januaru w za to zamołwitej komisiji předźěłanja wobzamknyli. Nětko chcedźa nadawk wupisać.
Sabine Otto, zastupnica rady potrjechenych, rjekny, zo su sej potrjecheni, lajkojo a biskopja přezjedni, kak wažne tajke přepytowanje je. Nětko njesměł so čas brojić. Studija ma „tomu přinošować, atmosferu sprawnosće a wustrowjenja stworić“. Potrjechenych chcedźa słyšeć, škody přiznać a dalokož móžno, zaso narunać. Skućićelam chcedźa składnosć dać, „zamołwitosć přewzać a so nakazać“. Otto rjekny, zo móže proces wupisanja wjacore měsacy trać, studija sama někak tři lěta. „Čas chwata, zastojnstwa so skónča, swědkojo zemrěja a potrjecheni rezignuja. Podajmy so skónčnje na puć!“