Niclas Füllkrug přiwisnikow Němskeje wubranki wumóžił
Třeći a posledni skupinski hrajny dźeń europskeho koparskeho mišterstwa bu wčera wječor zahajeny.
Prěnja poražka na domjacej EM bu w poslednjej mjeńšinje wotwobarana. Němske narodne mustwo je přećiwo Šwicarskej 1:1 wuchowało. Zaćah do wosmifinala běše hižo do partije wěsty, dźěše pak hišće wo prěnje a druhe městno.
Němska wubranka nastupi třeći raz ze samsnej zestawu, to dožiwichmy naposledk při WM 2002 pod dźensnišim sportowym direktorom DFB Rudijom Völlerom. Znowa pódla bě Manuel Neuer. Z mjeztym cyłkownje 18 zasadźenjemi na europskich mišterstwach je Mnichowski wrotar nowy rekordny wrotar EM. Do toho bě to Italčan Gianluigi Buffon.
Wšitke Poříčí w Spáleným Poříčí
Sokołki a Sokoljo na sportowej wuměnje pobyli
Kóžde dźesać lět je čěske město Spálené Poříčí w Plzenskim kraju na rjedźe, zo by sportowy a kulturny swjedźeń zhromadnje ze wšěmi dźewjeć čěskimi komunami – su to wjeski, wsy a města – wuhotowało, kiž maja w swojim mjenje Poříčí. W samsnym času je 50 hosći z Delan minjeny kónc tydźenja tam pobyło. 59. raz zetkachu so Sokołki a Sokoljo Ralbicy/Hórki ze sportowčemi a sportowcami TJ Sokol Spálené Poříčí. A tež komunalni zastupjerjo Plzenskeho kraja tam běchu, zo bychu nazhonjenja wuměnjeli a wo nowinkach pobjesadowali. Gmejnu Ralbicy-Róžant zastupowaše lětsa znowa wjesnjanosta Hubert Ryćer.
Rekordna ličba
Widźał, słyšał, napisał (24.06.24)
Awtor dźensa
Pětr Šołta
„Po wěstych prawidłach, tež we wubědźowanjach, z wjesela na pohibje a hraću abo k ćělnemu wukmanjenju wukonjane ćělne skutkowanje“, tajka je definicija za sportowanje. Intensitu, prawidłownosć a wosobinske cile wšak při tym kóždy sam za sebje postaja. Někotři so wjesela, su-li wšědnje znajmjeńša 5 000 krokow běželi, druzy su hakle potom zbožowni, hdyž po treningu ani wjac prawje stać njemóža. Wjesela na pohibje dla, a dokelž je to wězo tež raz zajimawe wužadanje, sym so lětsa na Slawiamaršu wobdźělił. To bě skerje krótkodobny rozsud. Spočatk meje smy ze swójbu Łužisku 50, čěsce Lužická 50, sobu nóžkowali. Zarjadowanje wotměje so hižo přez poł lětstotka w Hrádeku nad Nisou a móžeš tam po markěrowanych šćežkach 8, 15, 25, 35 abo 50 kilometrow po Łužiskich a Žitawskich horach pućować. Smy so za 25 km čaru přizjewili a tutu tež wšitcy derje zmištrowali. Wjedro a přiroda podłu šćežkam běštej krasnej, tak zo bě spěšnje jasne, zo budźemy tam klětu tež zaso pódla.
Přichodne městno we wosmifinalu wěste
Wčerawši hrajny dźeń europskich koparskich mišterstwow započa so z partiju Słowjenska přećiwo Serbiskej. Něhdyši Frankfurtčan Luka Jović trjechi ke kónčnemu stawej 1:1, jako lědma hišće něchtó z 63 000 přihladowarjow do wurunanja wěrješe. Serbiska bě po słowjenskim nawjedowanju přez Žana Karničnika (69.) drje komando přewzała a měješe wjac wobsydstwa bula, na tamnym boku pak bu w swojich nadběhach tež přeco njedokładniša. Jenož zaměnjeny Jović nadźiju njespušći. A tak šrubowaše so 26lětny wot AC Mailand w šestej mjeńšinje přidatneho hrajneho časa do wyšiny a zhłójčkowa k wurunanju. Słowjenska kaž tež Serbiska matej dale šansu na wosmifinale. Po dwěmaj z třoch hrow je Słowjenska z dwěmaj dypkomaj na druhim městnje skupiny C. Serbiska je z jednym dypkom poslednja. Zo bychu k.o.-koło docpěli, dyrbja Serbičenjo wutoru Dansku přewinyć. Słowjenska hraje k zakónčenju skupinskeje fazy tohorunja wutoru přećiwo top-faworitej Jendźelskej. Titulny faworit Jendźelska je dočasnu kwalifikaciju za wosmifinale zapasł.
Sport (21.06.24)
Satkulabičtura 2024
Team Radija Satkule serbskeho młodźinskeho sćelaka MDR swoju bičwolejbulowu turu lětsa znowa přewjedźe. Mustwa zetkaja so stajnje w 17.30 hodź., hrać budu potom wot 18 hodź.
08.07. Ralbicy
15.07. Jaseńca
22.07. Róžant
29.07. Kulow
05.08. Njebjelčicy
12.08. Chrósćicy
19.08. Konjecy
26.08. Miłoćicy
Sakske mišterstwo w dresurje
Jěchanske a jězdne towarstwo Njeswačidło wuhotuje lětsa turněraj w konjacym sporće na jěchanskej ležownosći w Holešowskej Dubrawce. Tónraz we wjetšim wobłuku jako sakske mišterstwo w dresurje a skakanju we wšěch starobnych klasach, a to na poslednimaj kóncomaj tydźenja smažnika. Jěcharjo a konje budu so w pruwowanjach hač do ćežkeje klasy S** wubědźować.
Wot dźensnišeho pjatka hač do njedźele přewjedźe so dresurowy turněr. Jutře wječor přeprošuja organizatorojo na party Ü30 to jěchanskeje hale a sobotu a njedźelu poskićeja nimo jěchanskeho sporta tež zabawy za swójby.
Nagelsmann: W nowembru njebychmy tutu hru dobyli
Druha hra, druhe dobyće: Němske narodne koparske mustwo je po Šotiskej tež Madźarsku porazyło a steji při domjacym europskim mišterstwje dočasnje we wosmifinalu. Z dobyćom nawjeduje Němska skupinu A ze šěsć dypkami a budźe znajmjeńša jako skupinski druhi do přichodneho koła zaćahnyć.
Hra započa so z nerwoznym wokomikom: Němska bul po zakopje zhubi, krótko na to dyrbješe wrotar Manuel Neuer prěni raz přećiwo Rolandej Sallaijej zapřimnyć (1.). Na tamnej stronje postara so nadběhowar Kai Havertz wo strašnu scenu před wrotami, jako so w dwuboju přećiwo Willijej Orbánej přesadźi a zakónči. Tola wrotar Péter Gulácsi parěrowaše ze spěšnej reakciju (11.). Potom přěhra Orbán w šěsnatce znowa wažny dwubój. Kapitan Němskeje İlkay Gündoğan přesadźi so robustnje přećiwo madźarskemu nutřkownemu škitarjej a wotpołoži w pjećmetrowskim rumje na Jamala Musialu, kotryž k nawjedowanju trjechi (22.). Krótko na to wuznamjeni so Manuel Neuer, jako sylny wólny kop Dominika Szoboszlaia parěrowaše (26.).
Přihotuja wulki jěchanski a skakanski sport w Holešowskej Dubrawce
Kampanja „Sorbisch na klar“ spěchuje turněraj konjaceho sporta w Holešowskej Dubrawce z twarom noweho zadźěwka w serbskich barbach. Zadźěwk w serbskich barbach a z wotpowědnymi informacijemi w zwisku z rěčnej imagowej kampanju je Budyska blidarnja twariła. Bettina Wenderothowa je so z čłonom Njeswačanskeho jěchanskeho towarstwa Jakubom Žurom zetkała a wšelake informacije k turněromaj, kotrajž přewjedźetaj so na přichodnymaj kóncomaj tydźenja nahromadźiła. Hnydom dwě njedźeli pospochi wuhotuje tamniše jěchanske towarstwo mjenujcy sakske mišterstwa. Najprjedy w dresurje, potom w skakanju.
Spočatk tydźenja knježeše w konjencu w Holešowskej Dubrawce hišće swjaty měr. Łastojčki tam lětachu, konje nastajachu wuši a hladachu wćipni do swěta. Wonka pak so hižo tydźenje dołho pilnje dźěła, a to na arealu Njeswačanskeho konjaceho sportoweho towarstwa w Holešowskej Dubrawce.
„Serbske heje“ na firmowym běhu
Čěska překwapjenka bjezmała so radźiła
Poslednja hra dnja bu w Lipsku přewjedźena a rěkaše Portugalska přećiwo Čěskej. Hižo ze zahwizdanjom nastajichu Portugalčenjo dwaj rekordaj. Cristiano Ronaldo je nětko prěni profi, kotryž je při šěsć europskich mišterstwach nastupił. A nichtó njebě dotal při jednej EM tak stary kaž šef w škiće: Pepe. Zakitowar FC Porto je 41 lět a 113 dnjow stary. Ronaldo a Pepe staj dźěl třećeho najdróšeho kadra EM, jenož Francoska a Jendźelska maja wyšu wikowansku hódnotu. A přiwšěm mějachu so přećiwo hłuboko stejacym Čecham ćežko. Portugizojo pytachu z wjele měnami pozicijow dźěry w čěskim škiće, tempo pak hustodosć pobrachowaše. Bruno Fernandes wuspyta so tohodla raz z 25 metrow, sadźi pak bul snadnje wyše wrotow (24.). Leão suny so nimo přihrawki Bernarda (26.) a Ronaldowa třělwa bu blokowana (45.+1). Češa wokoło profija zwjazkoweho koparskeho ligista Bayer Leverkusen Patrika Schicka, přińdźechu lědma k wočakowanym konteram. Schick měješe so při wašnju hraća swojeho mustwa ćežko, dźesać mjeńšinow pozdźišo bu wón wuměnjeny. A widźeše wot ławki, kak Čěska naraz nawjedowaše.
Chróšćenjo w pěsku wuspěšni
Pjaty wólnočasny wolejbulowy turněr serije „top-sydom“ we Worklecach dobychu hrajerki a hrajerjo mustwa SJ Chrósćicy před ST 1922 Radwor a wučerjemi Serbskeho gymnazija Budyšin (SGB).
Pjata stacija wólnočasnych turněrow serije „top-sydom“ wotmě so minjenu póndźelu we Worklecach, a to prěni raz na nowym pěskowym hrajnišću Viktorije Worklecy. Hłownaj organizatoraj wječora Alexander Kral a Robert Wullenk powitaštaj šěsć mustwow na tak mjenowany „kobołkowy turněr“, mjeno, kotrež nasta hižo w dźewjećdźesatych lětach. Tradicionelnje dóstachu wšitcy akterojo po zhromadnemu sportowanju kobołkowe kołbaski.
Zwjeselace bě znowa wulki podźěl młodostnych, mjez nimi jědnaće šulerkow a šulerjow 8. do 11. lětnika ze Serbskeho gymnazija. Wolejbulisća Žołto-módri Kulow sčasom wotprajichu, tak zo jednotliwe cyłki w modusu kóždy přećiwo kóždemu z jednej sadźbu do 15 dypkow swojeho dobyćerja zwěsćichu.
