Serbski Sokoł je přizjewjenske woknješko za 35. volleyballowy turněr wo pokal Domowiny 1. apryla hišće raz wotewrěł, a to hač do kónca januara. Spočatk lěta je so hišće cyłk z Choćebuza (ze zapozdźenjom) přizjewił. Nimo toho je tež hišće dalše mustwo zajim signalizowało. Změje-li Sokoł hač do 31. januara dwaceći přizjewjenjow, móže turněr potom město 16 z 20 mustwami přewjesć.
Přizjewjene cyłki:
Mustwo 1296
Serbski dom Budyšin
Skupina Brodatych
ST 1922 Radwor
SGB – wučerjo
Rapaki
Dom biskopa Bena
Los Blockos
SJ Chrósćicy
Sokoł Budyšin
Dźiwje micki
Handicap
Bratrowstwo Róžant
Měrkowske wnučki
Škit Budyšin
12. lětnik SGB Jurij Bjeńš
Awtor dźensa
Tadej Cyž
Na polu zymskeho sporta jewja so tučasnje mnohe zajimawe, spektakularne a wažne wubědźowanja. Skrótka – zymska sportowa sezona je w horcej fazy. W alpinskim sněhakowanju bliži so klasikar w awstriskim Kitzbühelu. Tež swětowe mišterstwa w spěšnosněhakowanju w šwicarskim St. Moritzu steja před durjemi. Za sportowcow w nordiskim sněhakowanju (skakanje a sněhakowanje na dołhich čarach) zakónči so sezona z nordiskimi swětowymi mišterstwami w finskim Lahtiju. Tam chce potom Eric Frenzel swój titul z němskim mustwom zakitować.
Za někotrych atletow budu wubědźowanja wosebje napjate. Woni chcedźa po dołhej přestawce zaso wo medalje a wo dobyće wojować. Anna Veith (spěšnosněhakowanje, rodźena Fenninger), Gregor Schlierenzauer (sněhakowarske skakanje) a Marit Bjørgen (sněhakowanje na dołhich čarach) swjeća swój comeback. Přičiny přestawki, kotruž běchu tući třo w profesionelnym sportowanju zapołožilu, su wšelakore.
W regionalnym volleyballowym finalu wubědźowanja „Młodźina trenuje za olympiju“ wuwojowachu sej holcy 8. a 9. lětnika Serbskeho gymnazija Budyšin (SGB) slěbornu a hólcy samsneje staroby bronzowu medalju.
FSV Budissa Budyšin je mjeztym 18. halowy koparski turněr piwarnje Landskron přewjedła. Jako zakitowar pokala startowaše regionalny koparski ligist FC Hornja Łužica Neugersdorf. Prěni raz přewjedźechu wšitke hry w dwěmaj połčasomaj.
520 přihladowarjow dožiwi napjate partije, při kotrychž wosebje přiwisk Budissy swoje mustwo wuběrnje pohonjowaše. Wona je tež jako prěnja přećiwo Woclej Riesa nastupiła a 3:0 dobyła. Po druhej skupinskej hrě Budissy přećiwo Biskopičanam, kotraž skónči so njerozsudnje 3:3, dyrbješe poslednja hra skupiny A wo skupinskim dobyću rozsudźić. Wocl Riesa so přećiwo Biskopičanskemu KT 08 wobaraše a zaruči z wuslědkom 3:4 skupinske dobyće Budissy. W skupinje B přesadźi so FC Hornja Łužica Neugersdorf suwerenje přećiwo Jednoće Kamjenc (2:0) a ST Hnašecam-Dobruši (3:1). Druhe městno zawěsći sej krajny ligist Jednota Kamjenc z dobyćom 3:1 přećiwo Hnašecam-Dobruši.
Kurs za koparskich sudnikow
Koparski zwjazk Hornja Łužica FVO přewjedźe spočatk lěta kurs za sudnikow-započatkarjow. Tež zajimcy Zapadołužiskeho koparskeho zwjazka (WFV) móža so tam wobdźělić a pruwowanje złožić. Přizjewjenja su přez Jörga Webera pod móžne. Wukubłanje započnje so pjatk, 20. januara, w 17 hodź. w hosćencu „Am Markt“, Jänkendorfer Str. 1 w 02906 Waldhufen, OT Diehsa (Dźěže). Dalše terminy: 21.01. / 9 hodź., 27.01. / 17 hodź. a 28.01. / 9 hodź. Wažne při přizjewjenju je, zo formular „Antrag auf einen SR-Ausweis“ sobu zapodaće. Namakaće jón na internetnej stronje WFV.
Jutře na RB-supercup
Zapadołužiski koparski zwjazk (WFV) zarjaduje jutře, sobotu, 6. RB-supercup. To je halowy turněr za koparske cyłki, kotrež hraja na teritoriju WFV. W 14.45 hodź. so turněr zahaji, hrate budźe wot 15 do 19 hodź.
Volleyballowe dypkowe hry
14.1. 14:00 Worklecy – Wojerecy II
14.1. 16:00 Worklecy – Kundraćicy
21.1. 14:00 Koblicy – Pančicy (žony)
28.1. 14:00 Žitawa 09 III – Worklecy (žony)
4.2. 14:00 Pančicy (žony) – Wjazońca
4.2. 16:00 Pančicy (žony) – Zhorjelc
Přihoty na druhu połseriju
Po přestawce přez hody a Nowe lěto su nimale wšitcy koparjo FC Energije póndźelu k treningowemu zazběhej za druhu połseriju do Choćebuza přijěli. Štyri tydźenje maja woni nětko chwile so přihotować. Potom započnje so zaso horca faza winowatostnych dypkowych hrow.
Dokelž bě měsac december połny priwatnych terminow, rozsudźichu so koparjo Sokoła Ralbicy/Hórki, swoju hodowničku na prěnju sobotu januara přesunyć. Hižo připołdnju zetka so 17 akterow prěnjeho a druheho mustwa w sportowni, zo bychu so tam někotre hodźiny wubědźowali. Stanij Šewc a Jurij Bjeńš chcyštaj z pjeć stacijemi najlěpšeho w rjadach delanskich koparjow zwěsćić. Na prěnjej staciji dyrbješe kóždy z bulom tak spěšnje kaž móžno parcours přeprěčić. Najlěpši bě Denny Gloxyn ze 14 sekundami. Na dalšich stacijach (přihrawki, flanki, hłójčkowane bule a třělenje z dźewjeć metrow do wěsteho kašćika) wukopachu so stajnje druzy jako najlěpši, tak zo dyrbještaj zamołwitaj chětro ličić, prjedy hač bě cyłkowny dobyćer znaty. Tón wšak rěkaše na kóncu tola Denny Gloxyn, kiž bě 276 dypkow docpěł, a to před Bosćijom Lulakom (264).
Minjenu sobotu popołdnju su wokolne młodźinske mustwa zaso ze zapalom w Chróšćanskej sportowej hali za bulom honili a wo požadany pokal Towarstwa Cyrila a Metoda wojowali.
Cyłkownje sydom mustwow bě so pola hłowneho zamołwiteho turněra Guida Zahrodnika přizjewiło, tak zo móžeše wón po wulosowanju dweju skupin po zwučenym systemje hry nawjedować. Jemu poboku za kompjuterom sedźeše Tadej Špitank, kiž wuslědki a třělene wrota registrowaše.
W skupinje A hrajachu Traktor Lejpold (hrajerjo z Noweje Wjeski a Kozarc), Lacio Chrósćicy, Inter Chrósćicy a Topanowi japoštoljo (młodźina z Njebjelčic a Serbskich Pazlic). W skupinje B nastupichu cyłki z Wotrowa, Viktoria Worklecy a Puklot Chrósćicy (zestawa z juniorow kaž tež koparjow 1. a 2. mustwa SJC).
Hózk (UH/SN). Zo so 27lětny Roland Salowski a 31lětny Thomas Jentsch w małym Hózku stajnje zaso wo překwapjenki starataj, wo tym swědčeše minjenu njedźelu prěnje poradźene nowolětne płuwanje early blackbird. Přećelej běštaj je runje tak zhromadnje organizowałoj kaž wuspěšne wubědźowanje blackbird-run w pózdnim lěću 2015 a 2016. Wulka ličba wobdźělnikow na běhomaj po zadźěwkach dopokaza, zo předewšěm młodźi ludźo wurjadne wužadanja rady na so bjeru. Čehodla potajkim tajke něšto podobne tež w zymje njepřewjesć?