Sakskej ministerstwje za kultus kaž tež za financy matej dale rozmyslować

Drježdźany/Budyšin (SN/MiR). Powołanje wučerja zasłuža sej ze stron stata wjetše připóznaće a wyši prestiž. Tole žada sej předsydka Serbskeho šulskeho towarstwa Ludmila Budarjowa. „Sym z toho zludana, zo njeje so sakski kabinet na paket naprawow přećiwo pobrachowacym wučerjam dojednać móhł“, wona rozłožuje. Wšako bě so tón zańdźenu njedźelu k wosebitemu wuradźowanju zešoł, tola bjez jasneho wuslědka. Kultusowa ministerka Brunhild Kurth a financny minister Georg Unland (wobaj CDU) chcyštaj, zo so přihotowany paket naprawow tón dźeń wobzamknje. Po zdaću pak ma koaliciski partner SPD dalšu potrjebu wuradźowanja. „Wučerjo kubłuja přichodnu generaciju, kotraž budźe dalše wuwićowe procesy postajeć“, tak Ludmila Budarjowa, „tuž słušeja k připóznaću wotpowě­dna mzda a dobre ramikowe wuměnjenja. Pola dźěći lutować a z tym na wučerjach, je wopačny puć.“ Předsydka Dźěłarnistwa za kubłanje a wědomosć GEW Ursula-Marlen Kruse bě z tym ličiła, zo wuslědk wuwostanje.