Budyšin (SN/MiR). Akcija „Přimaj so gratu!“ ma być prěnja iniciatiwa zastupnistwa serbskeje młodźiny, kotrež přichodne tydźenje wutworja. Hač do 31. julija 2017 maja młodźinske kluby, cyłki a towarstwa składnosć, zapodać swoje ideje za projekt, wusměrjeny na skrućenje serbskich młodźinskich cyłkow. Na internetnej stronje Domowiny namakaja zajimcy download z dokumentom, a tón maja wupjelnić. Žadane su konkretne wotmołwy na sydom prašenjow. Wobsah projekta maja zajimcy ekstra podać. Spěchowane budu předewšěm tajke projekty, za kotrež serbsce abo dwurěčnje wo spěchowanje proša.