Šulerjo 4. do 8. lětnika wobdźěleja so na rěčnym lěhwje SŠT

Wodowe Hendrichecy (SN/apa). Lěćo–přećeljo–wjeselo, to je prózdninske rěčne lěhwo 2017 we Wodowych Hendrichecach. Hač do 31. julija hišće přebywaja šulerjo wot 4. do 8. lětnika we woblubowanym prózdninskim domicilu. Ze 66 serbskimi a serbšćinu wuknjacymi dźěćimi je zajim porno zašłym lětam ze zdźěla jenož něhdźe 20 přizjewjenjemi zaso widźomnje přiběrał. Wo wotměnjawy program staraja so zaso kubłarjo a studenća, Syman Hejduška, Michaela a Julija Młynkec, Bosćij Bejma, Marlis Młynkowa, Hańžka Šimanec a nawoda lětušeho lěhwa Matthias Möller.