Serbske šulske towarstwo přednošk poskićiło
Budyšin (SN/MiR). Wostajimy wšitko při starym, abo chcemy puć změnow kročić? Kardinalne prašenje to, kotrež zańdźenu sobotu na wšěch 60 zajimcow na přednošk prof. dr. Malte Mienerta do Budyskeho Serbskeho domu wabješe. Referent zamó kubłarki a kubłarjow a dalšich přistajenych Serbskeho šulskeho towarstwa wot prěnjeho wokomika putać, byrnjež z dosć prowokantnymi prašenjemi. Jeho stawizny wjedźechu do časa Němskeje demokratiskeje republiki, w kotrymž bě tež hižo dźěl přitomnych na dobro dźěći skutkował. Tak spóznachu mnozy jeho dopóznaća jako podobne abo samsne. Jako přikłady mjenowaše wón postupowanje při rjadowanju jědźe, spanja a zaběrje dźěći pod hołym njebjom. Žadanja kubłanja – Mienert mjenowaše sakski kubłanski plan přikładny – wotpowěduja dźensa sylnišo wužadanjam ze stron dźěći, kotrež sej dźeń a wjetši žiwjenski rum ze samokubłanjom zdobywaja.