Muzejownicy měrja so z poskitkami na wšitke starobne skupiny

Budyšin (SN/MiR). Budyski Serbski muzej pyta za móžnosćemi, dźěći a młodostnych na atraktiwne wašnje do swojich wustajeńcow wabić. Tuchwilna, zaběraca so z bajowej figuru Krabata a realnej wosobinu Janka Šajatovića, skići za to dobre wuměnjenja. Mnohe serbske, ale tež němske šule poskitk za wosebite wodźenja rady přijimaja. Hakle tón tydźeń su ju Budyscy serbscy gymnaziasća 10. lětnika wopytali. Dalši, šulerjo 11. a 12. kaž tež 8. lětnika, su sej pokazku runje tak wobhladali, kaž šulerjo z Kulowa. Přizjewiła je so tež Bukečanska šula. „Hač do apryla, hdyž so wustajeńca zakónči, mamy hižo mnohe terminy do protyki zapisane“, praji zamołwity za posrědkowanje kultury a zjawnostne dźěło Měrćin Brycka.