W Budyskej regionalnej wotnožce Sakskeho krajneho zarjada za šulu a kubłanje (LaSuB) přija wčera popołdnju 41 wučerkow a wučerjow wopismo zastojnika. Woni běchu jedna z prěnich skupin po wšej Sakskej.
Budyšin (SN/MiR). Mjez tymi, kotřiž su wčera do zarjada přišli, bě tež wučer serbskeho pochada. W štwórtej ze štyrjoch skupin móžeše Maćij Čižank, wučer Budyskeho Serbskeho gymnazija za němčinu a stawizny, z rukow statneho sekretara Herberta Wolffa wopismo zastojnika přijeć. Do toho pak měješe runja swojim kolegam z pozběhnjenej ruku spřisahać, zo chcedźa zastojnistwo po najlěpšej wědźe a wědomju wukonjeć, wustawu wobkedźbować, prawo zakitować a prawdu napřećo wšitkim nałožować. Mnozy dodachu swojej přisaze „z Božej pomocu“. Maćij Čižank po swjatočnym akće rjekny: „Runje za sakski šulski system je to kročel doprědka, toho abo tamneho wučerja docpěć abo wróćo zdobyć. Wosobinsce so za mnje ničo njezměni, nastupajo swoje dźěło w šuli docyła ničo.“