Jan Šołta ma wotpohlad, wědu na šulach šěrić, za dobry a trěbny
Konjecy/Drježdźany (SN/MiR). Tučasny trend, přirodu zachować pomhać, zawjazuje zdobom tež škit překasancow, předewšěm pčołkow. Hižo šulerjo trjebaja pohon, wědomje z wobswětom wobchadźeć. Sakske knježerstwo a sakski zwjazk pčołarjow stej podpisałoj zwjazowacy dokument pod hesłom „Šulerjo pomhaja pčołkam“. K tomu pohonjał je serbski pčołar Jan Šołta z Konjec na njedawnej rozmołwje ze sakskim statnym ministrom za kultus Christianom Piwarzom (CDU) w Ralbicach. Šołta mjeztym hižo jědnate lěto zajimowanym šulerjam Ralbičanskeje wyšeje šule wědu wo pčołarjenju posrědkuje. „Sym ministrej Piwarzej tehdy rjekł, zo dyrbjeli na kóždej šuli tajki poskitk měć. Při tym njejsym zatajił, zo žada sej angažement wot pčołarja wjele mocy, prócy a drobne dźěło.“ Konječan je dotal wšitke trěbne financne a materielne inwesticije sam přewzał. Tak wón jenož w Ralbicach za dorostom njepyta, ale posrědkuje swoju wědu šulerjam z Budyšina přez Chrósćicy hač do Kulowa.